FMTB cu curso di percusion exitoso

Diadomingo ultimo 23 di mei Fundacion Movemento ta Bida a tene un anochi di entregamento di certificado na tur esnan di edad 60 plus cu a participa den un curso di percusion duna p’e experto maestro Vio Wester. Esaki a tuma lugar den aire liber di Lago Heights Club for di 6 pm pa 8.30 pm. Un total di 60 persona tabata presente riba invitacion personal di cual un lista completo di nomber y tel ta den poder di FMTB. E presentenan tabata familiar of conoci di e partisipantenan.

P’e entregamento di e certificado maestro Vio Wester a invita 5 musico, kendenan tabata, 2 trompet , 1 gitara, 1 bajo y 1 piano pa compaña e alumnonan. Un total di 5 cancion a worde toca na unda e musiconan tabata te patras di e podium y 4 rij di conga padilanti un tambor, un timbal y un maraca. Tur cu nan mondkapje bisti y riba distancia di otro.

Vio Wester mes tabata dirigi e grupo para abow y no riba stage. E alumnonan cada un a haña opportunidad pa toka 1 of 2 cancion. Tambe Mighty Reds y Mighty Cisco a canta cada un nan calypso conoci pa duna e alumnonan mas animo pa keda train y toca nan instrumento favorito.

Un total di 11 participante a ricibi nan certificado for di man di Minister Xiomara Maduro, kende a worde invita dor di FMTB pa haci esaki. Un danki pa nos Minister di Cultura pa a acepta nos invitacion.

E lesnan aki a worde duna den cuadro di e programa Hunto Grandi Grandi Hunto di FMTB y a worde financia dor di CEDE Aruba.

Tambe nos kier a gradici Tipico Palisia cu a duna un presentacion sublime despues cu un aña nan no a subi riba e tarima. Tipico Palisia ta consisti di 6 entregante y 2 di nan tambe tabata participante di e curso di maestro Vio Wester y pesey a haña e invitacion pa toca 4 cantica.

Caha di Orgel di Oslin Trimon tambe a deleita e publico cu algun cancion cu a cai masha na agrado di e publico presente.

P’e sonido no tabata mucho duro nos kier a gradici e soundman cu a pone solamente dos speaker na un banda di stage y tur hende por a conbersa trankil.

E cursonan aki ta sigi aki 2 siman cu e segundo grupo y nan lo tuma lugar na Lago Heights Club cu ta colabora cu FMTB dunando nan club gratis p’e lesnan aki.

Si bo tin 60 plus aña bo tambe por participa y por yama FMTB na tel 586-8651. Tanto damas y cabayeros por partisipa y e ta gratis.