Hulanda ta nombra Goedhoop como su representante den COHO

Un sorpresa grandi, pero na mes momento un sorpresa logico cu ta bolbe mustra cu Gobierno di Hulanda, no tin confiansa den Gabinete Wever Croes y lider di MEP Evelyn Wever Croes.

Siman cu a pasa Gobierno Hulandes a dicidi di nombra Ruben Goedhoop, kende na luna di juni di 2020 a wordo nombra pa Minister demisionario Dangui Oduber, como Director di AZV, despues di un solicitud habri y a mira cu Goedhoop tabatin tur cualidad pa dirigi AZV.

Sinembargo na luna di october di 2020, e mesun Minister Dangui Oduber a dicidi di suspende e mesun Director Goedhoop aki, ora cu a bin un disputa formal riba transporte di pashentnan cu ta rekeri trato special di cuido medico.

Na mesun luna di october di 2018, a yega na un acuerdo cu sr. Goedhoop kende a ricibi loke e tempo ey a wordo cataloga como un “golden handshake” p’e por a bandona e puesto di Director di AZV y e persona aki a regresa Hulanda.

Siman pasa Gobierno Hulandes, a mira den persona di Ruben Goedhoop, como e persona ideal pa bira e “liaison hervorming Aruba” di Gobierno di Reino, den e institucion nobo conoci como COHO, cu t’e institucion cu tin cu atende cu placa di Hulanda di ayudo y con esaki lo por wordo gasta pa Gobierno di Aruba.

Pues un muestra bon cla cu Hulanda simplemente no ta confia e lider di MEP den nada cu tin di haber cu placa di ayudo y awor Goedhoop lo ta bek na Aruba den su funcion nobo y caminda cu Dangui y MEP of sin Dangui y MEP, lo bay determina den futuro con e placa di ayudo aki den forma di un prestamo, por wordo gasta y ta nan lo dicidi kico Gobierno di Aruba por haci of no por haci.

Pues claramente ta bolbe keda comproba cu Gabinete Wever Croes simplemente no tabatin e capacidad pa analisa cierto situacion y awor di repente e mesun persona aki ta para den un posicion hopi cardinal den futuro desaroyo, no riba asuntonan medico, pero riba henter e desaroyo di Aruba den proximo añanan.

Muestra no solamente di incapacidad, pero tambe di e falta di vision cu semper Gabinete Wever Croes a bin ta demostrando for di momento cu el a asumi responsabilidad di gobernacion di Aruba na 2017.

Pa colmo Prome Minister demisionario  y mucho menos Minister demsionario di Salubridad, no tin absolutamente nada di  protesta of di bisa riba e nombramento di Ruben Goedhoop den e posicion cu Hulanda a pidi’e p’e haci pa proximo añanan.

Su nombramento a wordo anuncia pa Gobierno Hulandes dia 21 di mei ultimo y esaki a wordo haci pa ‘Ministerie di Buitenlandse Zaken en Koninkrijksrelatie’ cu ta cay bou di e mandatario demisionario Raymond Knops. T’e tipo di cosnan aki ta resultado di un maneho di Gabinete Wever Croes sin pia ni cabes pa tres aña y mey riba practicamente tur tereno di gobernacion, pero aki ta keda comproba cu sr. Ruben Goedhoop ta “de lachende derde” ya cu en realidad e lo a bin Aruba pa controla maneho financiero di mesun Gabinete Wever Croes cu no solamente a dicidi di retira su persona, pero a duna un suma di miles y miles di florin cu ya caba ta hopi schaars pa Gobierno, n’e persona aki cu awor ta bin den un funcion cu ni Dangui y tampoco e lider di MEP lo por mishi cune.