Kico salud mental ta encera y dicon e t’asina importante?

Actualmente nos ta den luna di mei cu t’e luna di ‘conscientisacion di salud mental’. Ironicamente nos a wak e caso hopi lamentabel di hoben John Semeleer na comienso di luna.

Hopi hende a reacciona asombra cu algo asina a sosode, aunke tras di cortina y hopi biaha hasta den pleno bista tin hopi hende cu ta lucha un bataya ‘invisibel’ y/of ta duna señal scondi pa haya e asistencia cu kisas nan ta desea, pero no sa con pa expres’e.

Tin un cantidad grandi di hende cu no ta na altura di kico eigenlijk salud mental ta encera y pakico e t’asina importante.

E falta di comprension di e dos bandanan aki ta haci’e dificil pa uno c’e otro compronde otro y p’esey mester pone un enfoke riba e topico aki pa preveni mas caso fatal den futuro.

Mas y mas e tema di salud mental ta wordo treci dilanti den transcurso di e añanan – pero pakico e ta algo esencial y kico e ta?

Salud Mental ta inclui nos bienestar emocional, psicologico y social. E ta afecta con nos ta actua, pensa y expresa nos mes.

E ta determina con nos ta maneha stress, relaciona cu otro hende y traha nos decisionnan.

E ta importante den tur etapa di nos bida; desde infancia y adolesencia te cu ora nos ta adulto. Diferente factor por afecta nos salud mental, manera genetica, kimica celebral, experiencianan traumatico of abuso y historia familiar di problema pa cu salud mental, pa nombra un par.

Tin un concepcion falso cu hende cu problema mental ta un menasa publico y mester wordo isola.

Mientrastanto mayoria di hende cu ta bataya problema interno den tur sorto di status social ta aparenta di ta na bon salud.

E berdad incomfortabel ta cu mas hende cu bo ta kere tin algun of otro conflicto den nan mes, n’e punto cu nan ta practica habitonan dañino manera consumo excesivo di substancianan cu ta altera nan realidad.

Cua t’e señalnan cu por indica cu un persona tin problema cu su salud mental?

-Comemento/drumi excesivo of minimo

-Distanciamento di amistadnan y hobby(nan)

-Energia abou of casi no-existente

-Sentimento bashi/indiferencia of cu nada no tin importancia mas

-Dolornan sin causa

-Sinti mane no tin speransa

-Bebemento, humamento of consumo di droga mas cu usual

-Confusion inexplicabel, rabia, lubida lihe, “on edge”, miedoso y irita

-Grita familiarnan y amistadnan

-Experiencia cambio emocional grandi cu ta causa problema den relacionnan

-Memorianan y pensamentonan persistente cu no por sali di bo cabes

-Tende vosnan of kere den cosnan cu no ta berdad

-Contempla pa causa daño na bo mes of otronan

-Inabilidad pa haci cosnan basico manera bay trabou, scol of cuida bo yiunan.

Maneranan pa mantene un estado mental positivo y saludabel:

Conecta cu otro personanan

-Busca ayudo profesional si bo ta sinti bo mester di dje

-Mantene bo mes fisicamente activo

-Yuda otro personanan

-Haya suficiente soño

-Desaroya abilidadnan pa deal cu problemanan interno

E ta importante pa papia cu sernan keri y amistadnan cercano. E ta ok pa no sinti ok tur dia. Si bo wak un persona cu mester di ayudo, por acerca nan na un manera comodo y kisas un dia nan lo agradecibo pa dunanan bo temp’i dia.