Pareha di turista Merikano a bati Polis na St. Maarten

PHILIPSBURG – Antayera nochi tabatin un insidente violento masha pekuliar na Sint Maarten ora un pareha di turista Merikano – nan no a bisa si ta hende pretu of blanku – totalmente for di kontròl pa konsumo eksesivo di alkohòl, a disidi di bringa i bati Polisnan ku a bai pone òrdu riba nan.

Polis a arestá e pareha Merikano na Simpson Bay anochi lat despues ku e pareha a pone drama kontra Polisnan den un bar restorant.

Dado momento e homber su wowonan a bira skur i el a drenta den kushina dje restorant i a kuminsa kibra tur glas i tayó ku el a haña den e lugá ku yama Topper’s.

E hòmber tabata realmente pata-pata-pata fuma i ora dos Polis i un VKC a yega pa pone òrdu ta manera un pelikula di free-for-all tabata sosodé dilanti bisa dje publiko.

Publiko tabata filma e insidente manera loko i despues a sirkulá nan riba Facebook.

Riba un grabashon por mira polis ta boei e pareha kendenan ta na suela  riba parkeerplaats di Topper’s.

Tantu e homber komo e muher tabata lomba sunú i na karson dj’abou so.

E homber tabata grita e VKC pa baha for di su lomba, mientras ku e tabata resitá frasenan di e pelikula di gèngster Hamaikino “Shottas” di mas ku 20 aña pasá.

E hòmber a purba skòp e Polis, pero su patada tabata teriblemente swak, pasobra e tabata pechu’abou na suela.

Mientras ku Polis tabata hibé den ‘dog-catcher’, e tabata grita nan pa no mishi kune, pasobra si ta na Merka, e lo a mata nan masha dia.

Esei a provoká un miron pa splik’é ku e no ta na Merka sino na Sint Maarten.

Ora e Polis a fada di su resistensia el a zwai e homber tira den e dog-catcher. Riba un otro grabashon di vidio por mira un otro Polis doblá na dos agonisando di un skòp ku el a haña na su parti intimo i estando di boei den un outo partikular tabata zundra e Polisnan.

Direpente e homber fuma a habri e porta di dogcatcher i e agente di VKC a bira lomba pe muhé pa purba dominá e homber i e muher a haña chèns pa bula sali for di e outo i skòp e Polis den su stoma.

Djei e muher mitar sunú a trata di kore bai pero a pèrdè balans i a kai flèt riba su kara riba kaya for di unda nan a lastr’é hinka den e vehikulo polisial.

E show bochornoso a kaba ora nan a hiba nan Warda di Polis pa sera nan den sèl pa drumi te ora nan buracheria pasa.