Partido MEP ta confirma mas medida na caminda a base di Landenpakket aproba

Prome Minister demisionario Evelyn Wever Croes, recientemente a presenta e programa di gobernacion di su partido MEP, caminda en realidad e ta crea e impresion cu su persona no a goberna e pais aki pa ultimo tres aña y mey y tampoco Evelyn tabata bibando na Aruba.

Den su declaracion na presentacion di e programa di su partido, e lider di  MEP a sugeri cu “cada Arubiano por ta hopi orguyoso den tur loke nos a logra den ultimo tres aña y mey” mencionando cu e pais a pasa di un crisis pa otro.

Segun e lider di MEP, su Gobierno a cuminsa goberna den un crisis financiero, den un crisis social, den e crisis interno di Venezuela y e crisis cu el a yama constitucional, caminda Gobierno di Reino no tabatin confiansa mas den e Gobierno anterior.

Sinembargo ta mesun lider di MEP aki den campaña electoral di 2017, a sigura pueblo cu su partido lo soluciona e situacion financiero sin tuma medida, pero a bira tuma cantidad di medida contra pueblo, den e prome lunanan di su Gobierno.

E crisis social su Gobierno a dicidi di pone un suma cuantioso di miyones un banda for di presupuesto pa Minister Glenbert Croes ehecuta e plan social, e salbacion social cu nunca pueblo a haya pa mira, pero si a lanta un departamento caminda famia y amigonan a haya nombramento, pero pueblo a haya net nada.

E crisis cu Venezuela ainda ta vigente y ta e lider di MEP mes constantemente ta bisa cu frontera cu Venezuela ta keda cera por lo pronto y ainda no tin ningun indicacion cu su Gobierno a atende of soluciona e crisis aki.

Pa loke t’e crisis cu Reino constitucional cu e lider di MEP ta papia di dje, ta straño cu e ta tira esaki riba Gobierno anterior, mientras cu Secretario di Estado Raymond Knops constantemente ta bisa cu Evelyn Wever Croes, no ta cumpli cu palabracionnan cu su persona mes a trece dilanti pa wordo atendi.

Ya na luna di november di 2018, e lider di MEP a firma un protocol cu Hulanda tabatin y ainda tin pa e wordo cumpli y mesun cos cu medidanan den cuido medico cu Evelyn a trata di tira den scochi di Knops, pero kende despues a desmenti esakinan.

Pa colmo pa den e programa cu e lider di MEP a presenta ta para lo siguiente:

“E acuerdo firma cu Hulanda (Landspakket) tambe mester ser mira como parti di e reformanan cu MEP ta premira p’e añanan nos dilanti. Mayoria di e temanan den e acuerdo firma (red. cu Evelyn a firma), ta consistente n’e temanan di e Masterplan. Esaki ta haci cu e caminda pa encamina ta cuadra cu e pensamento local pa reforma y restructura Aruba pa un Aruba resilente y fuerte den e periodo nos dilanti.”

Pues esaki ta “duidelijke taal”, cu tin mas medida na caminda, mas medida cu e lider di MEP a bay di acuerdo cu nan pa saca e pais dilanti, e mesun pais cu Evelyn a bisa pueblo den campaña di 2017, cu e lo soluciona e asuntonan aki sin mishi cu cartera di pueblo, pero mientrastanto su Gobierno a ranca y kita e cartera for di henter pueblo caba.

Sin duda por conclui cu pueblo por spera mas medida na caminda y cu esakinan segun e lider di MEP, ta adicional cu loke su Gobierno caba a tuma contra pueblo y cu e biaha aki si, MEP lo saca e pais dilanti!