Señor Pik Pisas no a bin Aruba pa reuni cu Gobierno

Contrario na loke algun medio di comunicacion a indica, Prome Minister Evelyn Wever-Croes ta aclaria cu e no a nenga di ricibi señor Gilmar S. “Pik” Pisas.

“Nunca mi a nenga di ricibi ningun colega di Corsou of otro pais den Reino. Mi no a haya peticion di sr. Pisas pa reunion. Mi a compronde cu e lo tabata na Aruba pa un biahe priva y mi ta contento cu el a scoge Aruba pa descansa.

Semper e portanan di nos Gobierno ta habri pa ricibi tur nos coleganan di Corsou, Mescos cu tur otro pais den Reino”, Prome Minister Evelyn Wever Croes a enfatisa.

MALCONTENTO

For di Corsou nos a recibi informacion cu e partido di coalicion, PNP no ta contento cu Pik Pisas, kende a declara na Aruba, cu el a bin Aruba pa reuni cu un amigo di dje, Melvin Tromp di AVP y den mesun rosea a duna di conoce cu e lo tin un audencia cu Prome Minister Evelyn Wever Croes dialuna mainta.

PNP no a ser poni na altura di e reunion aki, te hasta p’e papia riba COHO cu Evelyn Wever Croes. Pero ora cu Pisas no por a haya e reunion anuncia, despues di a haci varios yamada, Pisas a conclui cu Evelyn Wever Croes no kier a recibi’e.

Ta berdad cu Pik Pisas no ta Prome Minister ainda di Corsou y ainda ta Parlamentario y como tal no por reuni cu Evelyn Wever Croes den su calidad di Prome Minister pa te hasta discuti riba COHO.

Aki na Aruba adelanta a ser bisa, cu unabes cu Pik Pisas a bin Aruba pa campaña cu su amigo di AVP, Melvin Tromp, cu hamas e lo ta bon bini serca Evelyn Wever Croes.