Avalancha di kargo kontra kandidato ministerial Ramon Chong

WILLEMSTAD – E rumornan ku ta sirkulando for di siman pasá i a originá den seno di e trahadórnan di CBA Television a eksplotá di un manera devastador i ‘full blast’ kontra e Presidente di Partido Nashonal Ramon Chong, kende alabes t’e di dos kandidato pa bira Minister den e koalishon di MFK i PNP.

For di ayera praktikamente tur medio di komunikashon a duna e relato ku luho i detaye, pero remarkabel ta ku for di seno dje partido riba kual e ta number dos i Presidente alabes, tabata reina un silensio  ku kasi ta hasi hende ku e ta surdu.

Aparte dje vershon ku un grupo di empleado di e kompania di televishon a divulga, nan a saka un vershon ofisial ku a bai pa Informador di gobiernu mr. Peterson riba e topiko Ramon Chong.

E karta ta bisa ku resientemente Partido Nashonal di Pueblo ku lo bai forma parti di e siguiente koalishon, a anunsiá ku Ramoncito Chong, kende ta Presidente di e partido, a keda proponé pa okupá un puesto ministerial den Gabinete Pisas.

Komo empleadonan (periodista, presentadó, kamarógrafo i tékniko) di CBA Television (Master Media Management) – formalmente nunka a termina e relashon di trabou – kual sr. Chong tabata responsabel p’e, nos kier a ekspresá nos preokupashon na interes di Kòrsou.

Mr. Peterson komo Formador ta responsabel pa un Gobièrnu ku mandatarionan íntegro.

Sr. Ramon Chong den su karera tabata metí den práktikanan ilisito ku no por mira lus di dia i hasta a risibí kondena pa aktonan di korupshon kometé tempu ku e tabata Diputado.

P’e motibu aki so sr. Chong  lo no por okupá niun puesto ministerial. I pa pone chèri riba e bolo, por tuma nota di e debakel di CBA Television.

Sr. Chong tabata propietario di e planta di televishon, pero hasiendo uso di konstrukshonnan hurídiko i personanan pa para komo intermediario, el a sòru pa via di e manipulashonnan aki, e no keda pone responsabel.

Nan ta sigi mustra ku e ta un empleado publiko, trahando na Ministerio di Desaroyo Ekonómiko i ta prohibí pa un empleado publiko tin un funshon sekundario. Riba su mes ya kaba esaki ta un aktitut dudoso.

Na aña 2019 bou di maneho di Ramon Chong e planta di televishon a bai atras i a yega asina leu ku Servisio di Impuesto a pone beslag riba mobilario i aparatonan, i a bende esakinan na findishi.

E tabata retené sèn di impuesto i primanan sosial sin ku e tabata entrega esakinan na Servisio di Impuesto i Banko di Seguro Sosial (SVB).

Trahadornan no tabata risibí nan salario kompletu. E suma total di e debe ku nos a kalkulá ta ANG 150.000,- , pero probablemente esaki ta muchu mas tantu ku e sifra ariba menshoná. Tur esaki komo konsekuensia di no paga salario/montantenan a base di akuerdo ku CBA/Chong, ku nos tin derechi riba dje. Ademas sr. Chong tin debenan kuantioso di hür atrasá.

Historia di e trahadornan di CBA ta teribel i te awe tin trahadornan ku debenan kuantioso, beslagnan ku a keda pone riba salario i propiedatnan ku konsekuensia ku tin hasta kaso di un persona ku a pèrdè su kas ku a keda bende na findishi dor di banko.

En todo kaso ta hopi kla ku sr. Ramon Chong tin debenan kuantioso na Servisio di Impuesto i SVB ku e mester paga, den kaso ku ainda e ta aspirá pa okupá un puesto ministerial.

Kisas komo abogado, mr. Peterson  lo sugerí pa nan tuma pasonan hurídiko, pero den e kaso aki lamentablemente esei lo no ta posibel pa motibu ku sr. Chong, astuto manera e ta, no tin nada registrá riba su nòmber.

Banda di esaki tin e hecho ku CBA Television no a keda deklará bankarota dor di sr. Chong òf otro persona ku komo konsekuensia ku nan no por apliká pa bin na remarke pa risibí sesantia.

Mirando e relashon ku sr. Chong tin ku e Direktor di SVB, lo no tabata nada difísil pa el a atendé asuntunan na un manera hustu ku e trahadornan.

Lamentablemente e sa semper di kana e kamindanan ku ta kumbiní su persona mirando ku no ta promé biaha ku un kompania ta bati bankarota bou di su maneho.

E trahadornan e keda ketu e último dos añanan, saliendo for di e punto di bista ku e lo asumí su responsabilidat, pero nada di esaki a resultá bèrdat. Awor ku a bira konosí ku sr. Chong pensando solamente riba su mes i hinkando hopi hende den problema i aki aya tin debenan habri, ke bai okupá un puesto ministerial, desishon a kai ku nos komo eks trahadornan no ta bai sinta ketu mas.

Pueblo di Kòrsou mester sa ta ken ta bai atendé su asuntunan. Komo trahadornan den media ku último añanan a raporta kasonan ku no por mira lus di dia, ta hasi un apelashon riba bo persona komo Formador pa no kometé e eror i laga sr. Ramon Chong presta huramentashon komo Minister.

Ku un karchi di kastigu, debenan kuantioso na SVB i Servisio di Impuesto, debe di hür di edifisio i trahadornan, ta imposibel ku sr. Ramon Chong por bira Minister.

Integridat ta kondishon number unu pa un persona keda nombra komo Minister i den e kaso aki e no ta kumpli ku e kódigo di integridat. El a faya komo gerente di un kompania i 30 trahador i ta inaseptabel ku sr. Chong ta bira lider di e pais aki ku ta konsistí di 160 mil hende.

Komo eks trahadornan lo hasi tur loke ta den nan alkanse pa evitá esaki i di kurason nan ta konta ku  koperashon di mr. Peterson komo Formador.

Gustosamente nan ke sa su opinion riba esakinan ademas ku nan ta konta ku su koperashon i ta dispuesto pa personalmente duna mas aklarashon riba e puntonan menshoná.

Firmantenan dje karta  ta Ulrich Leonora komo persona di kontakto, Wendell Martis, Quido Tecla, Surelma Miguel, Elton Paulina, Rick Hart, Merietza Haakmat i  Pipo Villasmil. Mientras tantu èks Gezaghebber i èks Minister Stanley Betrian a splika kategorikamente ku manera lei ta formulá asuntu di screening, e no por afektá kandidatura di Chong.