AWEMainta no ta corant di AVP, pero si boycotia pa un Gobierno di famia y amigo

Pa algun luna caba partido MEP y su lider ta insisti di cuestiona publicacionnan di AWEMainta relaciona cu e partido geel, cuestionando esaki,  ya cu loke ta wordo treci dilanti, no ta nada traha pa un of otro partido politico.

Ta un hecho concreto si cu cantidad di informacion cu AWEMainta ta ricibi, ta procedente for di seno di partido MEP, for di Ministerionan di Gobierno den oficina di Cocolishi, di hendenan di MEP cu ta mira inhusticia y abuso tumando lugar, caminda solamente un grupo di principalmente famia ta wordo previlegia.

E reaccion di Minister Presidente demisionario riba publicacion di AWEMainta relaciona cu presencia di e proximo Prome Minister di Corsou, sr. Pik Pisas, ta bolbe confirma cu su persona tin problema pa atende cu berdadnan duro cu cual e ta wordo confronta.

Bishita di Pik Pisas no tabata bishita oficial, pero kier a hiba un dialogo cu Gobierno, pero no a haya oido p’esaki caminda Prome Minister di e pais, ta neglisha presencia di e proximo Prome Minister di Corsou cu ta un partner den Reino.

Kisas publicacionnan manera den e edicion di ayera caminda a analisa y a mustra cu propio palabranan saca for di e programa di gobernacion di MEP, cu ta practicamente un siguransa na pueblo cu tin mas medida ta na caminda den proximo lunanan, ta algo cu kisas e lider di MEP no kier pa AWEMainta informa pueblo.

Cu BTW ta un hecho, cu MEP ta bolbe bisa pueblo cu e lo bay drecha e situacion financiero di e pais, algo cu el a priminti di haci for di 2017 caba, pero nunca a haci y na lugar di soluciona e situacion pa pueblo por bisa mas trankil, lider di MEP a percura pa hopi di su famia yega na dje, si a saca probecho di presencia di MEP den gobernacion.

Ora cu lider di MEP ta pretende cu AWEMainta ta corant di AVP, anto tin cu mustra cu pa algun aña caba, e planta televisora a bira un sucursal di Gobierno di MEP, superando e planta televisora na Santa Cruz.

AWEMainta ta sigui haci su deber grandi cu e tin cu comunidad di Aruba, di duna informacionnan cu pueblo tin derecho di haya ifnormacion ariba, nos deber di bisa pueblo e berdad, sigur ora cu tristemente e Prome Minister no ta sincero cu su pueblo.