Èks Minister fugitivo di Surnam lo a hui bai Cuba via Kòrsou

WILLEMSTAD – Gobiernu di Surnam lo hasi un petishon na Gobiernu di Cuba pa manda nan kualke informashon ku nan por tin di paradero dje èks Minister di Finansa Gillmore Hoefdraad, kende ta fugitivo pa hustisia di su pais.

Gobiernu di Surnam lo tuma e paso aki despues ku for di Guyana a drenta informashon ku e èks Minister lo a biaha pa Cuba via Kòrsou dia el a hui di su pais.

Un dia despues di inougurashon dje aktual Gobiernu di Surnam no a mira  Hoefdraad mas i literalmente  e ta “Gone with the wind!”

Ministerio Publiko na Surnam tin kaso penal kontra dje den Korte pa delitonan finansiero ku el a kometé den su funshon.

Di akuerdo ku e korant Guyanes ku aparentemente tin bon fuente na Kòrsou, Hoefdraad lo a huy via Guyana, Kòrsou i Republika Dominikana pa finalmente e establesé su mes na Habana.

Periodistanan di e korant De West lo tin sufisiente informashon pa konstatá ku Hoefdraad ta na Cuba for di aña pasá despues ku el a sali for di Guyana.

Gobiernu di Surnam a pidi Interpol pa pone su nomber riba lista di fugitivonan internashonal, pero ta Cuba so por kontesta e pregunta i si t’asina lo pidi nan pa deportá e Minister.

Hustisia ta buska Hoefdraad p’e skandal di malversashon den Banko Sentral di Surnam i pa kual a arestá kaba e Gobernador di Banko Sentral dje pais, Robert van Trikt. Ministerio Publiko a pidi 12 aña di kastigu di prizon pa Van Trikt.