Fundacion Lanta Papiamento a organisa un teleconferencia pa tur partido politico tocante enseñansa y maneho di idioma na Aruba

Recientemente directiva di Fundacion Lanta Papiamento pa medio di su comision di actividad a organisa un anochi di teleconferencia pa duna informacion relevante y actual tocante enseñansa y maneho di idioma na Aruba. Tur partido politico activo a keda invita.

E partidonan cu a presencia e teleconferencia ta Accion21, CURPA, MEP y UPP. Tabata un anochi yena cu informacion y curiosidad di e partidonan politico presente.

E prome orador di e anochi tabata sra. S. Maduro, Msc cu a duna informacion tocante e plan strategico pa enseñansa na Aruba: Plan di Educacion Nacional 2030 (PEN 2030). E informacion a encera un splicacion kico ta PEN 2030, e motibo pakico a desaroya PEN 2030, e proceso participativo di varios gremio, punto di salida cu ta inclui tambe meta 4 di desaroyo sostenibel (Sustainable Development Goals (SDG) cu ta encera entre otro Calidad di Educacion.

Ademas a comparti e vision di PEN 2030 cu ta:“Enseñansa di calidad cu ta permiti e generacionnan (di hoben te anciano) desaroya optimalmente nan necesidadnan individual pa siña, nan ambicionnan y nan talentonan y aporta na un sociedad sostenibel.”

E di dos orador tabata sra. drs. M. Williams cu a duna un bista di e resultado actual di inovacion den enseñansa Arubano cu a hiba un titulo metaforico:

“Tin shimarucu pa nos prikichinan?” Sra. Williams a duna informacion di importancia di Papiamento den enseñansa na Aruba. Tambe a presenta dato obteni pa medio di investigacion cientifico di resultado di e proyecto piloto Scol Arubano Multilingual, cu ta encera uzo di Papiamento como idioma di instruccion ofreciendo y for di tempran otro idioma relevante na Aruba.

Su ultimo parti a duna un bista di solucionnan palpabel for di nos propio tera pa brinda un enseñansa cu sentido pa nos muchanan, pues for di varios angulo por mira e compromiso y ekipa pa brinda un enseñansa cu sentido pa nos muchanan.

Na final a conclui cu no tin ningun argumento cientifico valido cu por hustifica mantencion di e sistema actual na Aruba, caminda Hulandes keto bay t’e idioma di instruccion. E presentacion di sra. drs. Williams ta acesibel riba nos pagina di Facebook https://fb.watch/5CPUi0z-5d/

E di tres orador tabata sra. dr. J. Pereira cu a duna un presentacion cu a hiba como titulo: “E importancia di un instituo nacional pa maneho di idioma”. Sra. dr. Pereira a duna informacion tocante kico un idioma ta, e derecho di e ser humano pa por desaroya su idioma materno y e respet cu nos mester duna na nos Papiamento.

Ademas el a splica cu tin estudio cu ta mustra nos cu pa maneha e situacion complica di idioma den un pais, mester tin un instituto linguistico nacional cu ta ocupa su mes cu cuater area di atencion pa yega na un situacion linguistico harmonioso, coherente, favorabel pa henter pueblo. A splica cada area di atencion, pakico nan ta asina importante y con esaki ta hinca den e tarea cu e instituto linguistico aki lo mester ehecuta. Na final el a comparti su conclusion y mas ainda su recomendacion n’e politiconan presente.

Directiva di Fundacion Lanta Papiamento kier gradici inmensamente cada orador pa duna informacion hopi valioso n’e partidonan politico cu tabata presente durante e teleconferencia. Ademas nos ta sumamente contento y orguyoso di e presencia y participacion activo di e politiconan presente.

Den e siguiente dianan FLP lo sigui publica informacion relevante p’e pueblo Arubano y particularmente pa tur politico cu lo participa den e proximo eleccion dia 25 di juni 2021.