Ambtenaar cu a mèld malo for di 2011 a gana Gobiernu dos biaha den Corte

Un kaso basta pekuliar y cu por sirbi pa mustra Gobierno con nó mester kita un empleado for di trabou, a tuma lugar den Corte di Husticia Comun recientemente caminda un empleado di Gobierno di Aruba cu ta malo na cas for di 2011 a bringa su retiro cu exito den promé instancia y despues ora cu Gobierno a apelá e decision di Hues, el a bolbe gana Gobierno, pasobra e alegatonan cu Gobierno a uza tabata simplemente nivel di amateur.

Y esey cu e homber a nenga di laga dokter di seguro examiné p’e por haña pensioen…..

Ta sosode cu for di augustus di 2011 el a mèld malo y no a bay traha mas y tampoco a bay dokter pa busca un papel di AO.

Esey a resulta den su retiro na october di 2017 pa motibo medico.

E ambtenaar a apelá, pero a gana e caso den apelacion, es más, dia cu mester a bay Corte pa defendé su caso, e no a presentá mes y a autorisá Corte pa dal bay cu e caso den su ausencia. Stail di ‘con cu para, para…’.

Tempo e tabata trahana Gobierno e tabata ambtenaar den vaste dienst cu derecho riba pensioen como supervisor tecnico na Serlimar y tabatin derecho riba penssioen. (Serlimar te compania si recogé sushi na Aruba).

Dado momento el a yama nan bisa cu e ta malo y nunca mas el a bay traha, pero a sigi cobra.

Dado momento Gobiernu mes a haña cu el a abusá demasiado di bondad di pagador di belasting y dia el a yega e fecha maximo cu e por keda cas malo legalmente, Gobierno a duné retiro.

Normal ta laga e ambtenaar haci un chekeo medico promé cu duné retiro, pero e ambtenaar no a duna e dokter di Fondo di Pensioen tampoco pèrmit pa examiné.

Den promé instansia el a gana e caso pasobra Gobierno – negligente manera tradicional – nunca a proba cu a duné òrdo pa bay haci un chekeo medico.

SEGUNDO FASE

Di acuerdo cu LMA, ley cu ta goberná e condicionnan material di ambtenaar, ora un persona mèld malo y no por traha e por keda 4 aña cas. Pero ey a caba tambe y e mester bay traha of haña retiro.

(Na Còrsou ora un trahador keda dos aña malo, e ta cay bou di un otro regimen di SVB y tambe ta haña retiro).

Den e caso aki ta Gobierno a apelá e caso, pasobra nan ta para’riba cu a yama e homber pa sea bin traha òf bay dokter.

E homber a haci ningun di nan dos, pero e argumento cu Gobierno a uza pa duné retiro por a bien scirbié riba papel di toilet, pasobra loke nan a mustra Hues ta un carta cu Fondo di Pensioen di Ambtenaar a traha dia 6 september 2016, pero Corte no a haña e carta convincente.

Tur loke e carta ta bisa cu e Comision Medico di Fondo di Pensioen a constata cu e trahador no a duna pèrmit p’e dokter examiná su persona.

Y aki Corte a bati cabez di Gobierno y nan abogado pasobra nan por a manda por lo menos un copia dje carta cu nan a manda pe trahador pe mèld serca dokter hunto cu un rapòrt dje dokter. Y aki tur cos a caba: Gobierno a pèrdè e caso.

Di manera cu e supervisor ta keto bay den servicio di Gobierno y no kier bay dokter pa aclareá si e ta malo of laga.