Aruba Investment Summit 2021 como parti di iniciativa di promocion di inversion na Aruba

Durante un conferencia di prensa Minister Xiomara Maduro a trece dilanti cu como parti di e iniciativanan di promocion di inversion di Aruba, Departamento di Asunto Economico, Comercio y Industria (DEACI) ta organisa ‘Aruba Investment Summit 2021’.

E cumbre lo tuma lugar virtualmente dialuna, 31 di mei, diamars 1 di juni y diaranson 2 di juni 2021. Esaki lo cuminsa pa 9 or di mainta y lo termina 12 ‘or y mey di merdia.

Durante e cumbre lo tin oradornan internacional, tambe e miho lider-, ehecutivo- y comerciantenan local. E cumbre lo ta na Ingles y participacion ta gratis.

‘Aruba Investment Summit 2021’

Aruba Investment Summit 2021’ tin como obhetivo pa atrae inversionistanan local y di exterior, poniendo Aruba den centro di atencion como un destinacion di inversion, enfocando riba e oportunidadnan comercial den e Sectornan Prometedor di Aruba.

Esnan cu lo atende e cumbre aki lo haya un conocemento profundo di e proyectonan di inversion na Aruba, posibilidadnan di ‘test hub’, testimonio, contactonan valioso y mucho mas.

Programa di tres dia

E mandatario ta informa cu durante e cumbre lo tin participacion di varios experto, lider, ehecutivo y comerciante di empresanan local lo comparti nan conocementonan tocante inversion na Aruba.

Esnan cu lo atende e cumbre aki tambe lo wordo inspira dor di e orador principal cu ta un persona mundialmente conoci, sr. Bradley J. Sugars, propietario, autor y business coach di e compania multi miyonario di ActionCOACH y CEO di mas di 9 compania.

E oradornan lo comparti nan conocemento tocante e creacion di un economia mas sostenibel pa nos pais Aruba mediante su Sectornan Prometedor y e oportunidadnan comercial cu esaki tin pa ofrece na inversionistanan local y di exterior.

Registracion

Durante ‘Aruba Investment Summit 2021’, tur cu lo atende lo siña tur e ‘ins and outs’ tocante con pa haci negoshi na Aruba, e Sectornan Prometedor y e oportunidadnan comercial cu nos pais tin disponibel.

Por registra via https://hopin.com/events/aruba-investment-summit-2021.

Pa mas informacion of pregunta Por  tuma contacto cu sra. Zuleika Quant na DEACI via email z.quant@deaci.aw. E mandatario a termina gradiciendo DEACI p’e tremendo trabaonan haci p’e cumbre aki por tuma lugar otro siman.