Hoben turista di 29 aña a perde su bida na Shark Bay

Ayera pa mas o menos 5:50pm Central di Polis ta wordo notifica cu un dama turista lo tin problema den
lama na Shark Bay, cu ta keda poco pabao di Andicuri.
Diferente unidad di Polis a bay n’e sitio di e susedido y na unda na nan yegada a pidi di biaha pa
ambulance y brandweer.
Por a bin compronde cu aparentemente e dama turista lo a bay den lama y na un dado momento a haye
den problema, debi na un lama masha bruto mes.
E tour guide y tambe un amigo di e turista a purba pa yude, pero nan mes a hayanan confronta cu
problema den lama.
Dos otro persona a logra saca e dama turista y e tour guide. Nan a duna e dama turista CPR, pero no por
a haci nada mas pe.
Na yegada di personal di ambulance tambe a purba di re-anime, pero lamentabelmente e dama turista a
fayece.
E personal di Bombero tambe a yega n’e sitio p’asina yuda e turista cu a keda riba un baranca sin por
yega canto dor cu e lama tabata basta bruto.
Na un manera tactico personal di Brandweer a logra pa sake e turista masculino for di lama y personal di
ambulance a trate y hibe hospital pa un chekeo medico.
N’e sitio a presenta Departamento di Recherche, Fiscal y tambe Slachtofferhulp.
Pa 7:35pm dr.Texiere a constata morto di Melissa Carrasco di 29 aña di edad nacionalidad Mericano, a
nace dia 19 di augustus 1991. Por a mira cu debi n’e lama bruto, esaki a bati su victima na baranca, cu
mas bien a causa su morto.
Di parti Cuerpo Policial Aruba y nos di AWEMainta ta manda palabra di condolencia n’e famia di e
fayecido.