Integridad selectivo?

Pa: Daphne Lejuez

Un observacion – Gobierno a cai y a pidi pa Parlamento keda desolvi fin di maart.  Como motibo tabatin un falta di integridad, pa so lo tin un investigacion riba un di e partnernan den coalicion pa motibo di malversion di fondonan publico pa un Parlamentario (n’e momento ey tambe lider di un partido di e miembronan den coalicion).

Nunca mas di parti di Gobierno a pasa Staten, ni den un encuentro publico (OB), pa trata esaki. Y mucho menos, e fraccion cu ta sostene e partido mayoritario di coalicion, cu t’esun cu e kita su confiansa p’e motibo aki, tampoco nunca a pidi un reunion den Staten pa trata e caso aki.

Mientrastanto e persona ta den funcion, ainda e tin sosten como Vice Presidente, y es mas, awor ta fungiendo como Presidente di Staten den ausencia di e Presidente oficial di Staten cu ta na Hulanda te prome siman di juni desde cu a biaha diasabra ultimo.

Pues e pregunta ta, con por papia di Integridad si no ta trata e tipo di asuntonan aki cu bo mes ta señala y hasta tumba un Gobierno p’e? Pa tur otro cos si por a yama un encuentro publico (OB), pero pakico no a yama un reunion publico riba e tema aki of re-emplasa e Vice Presidente si enberdad tabatin tanto duda den su persona su integridad cu el a hasta costa Gobierno pa cay? Enfin – food for thought y nada personal contra niun hende – e principio innocent until proven guilty ainda ta con nos leynan ta funciona … pero e ta keda n’esnan cu a lansa acusacion y baha Gobierno, pa tuma accion of duna splicacion dicon no a actua, of es mas ta di acuerdo p’e mesun persona cu segun nan a causa e kiebro pa motibo di integridad, awe por t’e representante di e organo mas halto di nos Pais.