Lucha pa liderasgo den partido MEP ta inclinando pa banda di Dangui Oduber

Partido MEP a presenta su programa di gobernacion, pero algun dia despues Dangui Oduber a presenta su propio programa di maneho y di logronan completamente su so, confirmando loke AWEMainta pa algun tempo a bin ta mustra caba, esta cu eleccion 2021 lo determina futuro liderasgo di partido MEP.

Un lucha cu tin algun tempo caba construyendo su mes caminda varios confrontacion a yega di tuma lugar tabata y e gruponan cu ta sostene tanto Dangui Oduber como Evelyn Wever Croes, a yega di haya confrontacion cu otro.

Dangui a presenta su propio revista promocional, dunando informacion di loke el a bin ta haciendo y mustrando un cara totalmente diferente cu loke e partido mes a demostra te cu awor.

Resaltante den e revista propagandista aki, t’e hecho cu Dangui den e revista a presenta un relato con el a drenta politica mustrando cu na 2013 el a ricibi 1749 voto, mientras cu den eleccion 2017 el a aumenta esaki cu mas cu 600 voto pa un total di 2399.

Mesora ta sigui e prome logro grandi segun e propio Dangui den su periodo como Minister, ta titula “Maneho Covid-19” dedicando seis pagina n’e maneho cu su persona ta considera un logro grandi.

Pa loke ta deporte su logronan cu segun e miembro di MEP mes ta presenta, ta di pone iluminacion na algun tereno deportivo y tambe cu el a laga raspa varios tereno rond Aruba cu tabata yena di yerba mas tanto pa falta di actividad riba e terenonan.

No tin mucho mas di deporte, ningun plan pa futuro, ningun indicacion kico su persona y su partido lo bay haci y el a duna hopi atencion na ciclismo, algo cu su persona mes gusta haci.

Ora cu analisa e revista promocional aki, e ta confirma informacionnan cual AWEMainta tambe a publica riba dje, esta cu internamente tin un lucha formal tumando lugar, esta pa liderasgo di e partido geel, caminda sin duda e tendencia mas grandi ta pa guia Dangui rumbo pa bira lider di e partido pa reemplasa e actual lider Evelyn Wever Croes. Y tur esaki cu sosten di e miembro honorario, Nelson Orlando Oduber.

Un desaroyo cu a tin ta tumando mas y mas forsa mirando e campaña fuerte cu Dangui a bin ta hibando pa algun tempo caba, sosteni formalmente p’e experencia di su tata Nelson Oduber, kende ta ser considera e lider cu a scapa partido MEP di bati bancarota.

E revista promocional ta impresionante caminda notablemente, Dangui a duna hopi atencion tambe na salubridad publico, mustrando riba un mihor calidad di bida, inovacion den sector di cuido, hasta inversion den cuido medico y turismo medico.

Sinembargo tur e proyectonan aki cu Dangui ta promoviendo, ta proyectonan cu a inicia bou di Gobierno di Mike Eman, proyectonan manera expansion y remodelacion di hospital cu su persona a considera un proyecto desastroso y den cual lo tabatin hopi corupcion a tuma lugar.

Awe e ta produci un documento cu no ta papia na mas di corupcion pero si di calidad di cuido medico, e ta mustra riba mihor calidad di bida den cuido medico, pero su lider di partido Evelyn Wever Croes, a dicidi di saca 60 miyon for di mesun cuido medico aki, perhudicando hopi hende den comunidad.

E contentido ta papia di inovacion den sector di cuido, loke ta imposibel si ta saca 60 miyon for di mesun sector aki, caminda dokternan di cas tin cu adapta nan servicio na comunidad dor di medidanan cu Gobierno di Dangui a tuma.

E revista promocional ta di gran calidad, pero e contenido mescos cu e maneho hiba ultimo añanan, no ta cuadra cu e realidad berdadero cu pueblo a conoce bou di e maneho aki.