Nunca caso Avestruz por keda cla pa bin den Corte prome cu eleccion 2021

Semper a boga pa respet pa nos instutucionnan cu mester t’e wes’i lomba di democracia di e pais y den e proceso aki, Ministerio Publico ta hunga un rol di vital importancia.

Sinembargo a brinda respet na Ministerio Publico den casonan cu e ministerio aki no a merece respet, caminda e institucion mes a crea e impresion cu nan no ta sincero ni cu nan mes ni tampoco cu pueblo di Aruba.

Na mes momento mas y mas ta sali na cla cu Ministerio Publico a ser transforma den ultimo decadanan, den un instrumento politico maneha y hasta dirigi p’e organiascion politico di MEP, ya cu den pasado caba tabatin casonan cu a tuma lugar contra politiconan di AVP, cu semper a carga e stempel di metemento di partido partido MEP.

Den e famoso caso contra lider di AVP,. Henny Eman y e politiconan Tico Croes y Otmar Oduber, tambe e tipo di maniobranan aki a lanta cabes, pero e lider di AVP e tempo ey a dirigi su caso na Corte Superior pa pone Ministerio Publico na waterpas, loke a wordo logra tambe.

Despues a surgi  e caso di Lotto pa Deporte caminda tambe tabatin investigacion cu a tuma lugar pero pa un motibo of otro, esaki a wordo “geseponeerd’ dor di un PG, kende ta famia yega na Hendrik Croes, kende a nombre como PG di Aruba.

Na 2017 a surgi e caso contra di ex Minister Paul Croes, cu tambe a wordo gerek manera un kakiña, violando derechonan di e politico aki severamente, tur den nomber di un husticia cu no tabata husticia y cu ainda ta den Corte Superior pa wordo trata.

A drenta Paul Croes su cas, a pone cantidad di microphone den cas di e homber, a tap su telefonnnan, a sigui su pasonan di cerca, pues a “stalk” e politico y su famia pa un tempo hopi largo.

Hasta ora cu a permiti Paul Croes bay liber, el a wordo priva di su derecho di expresion, algo sagrado den un pais liber, pero cu Ministerio Publico ta considera un arma legal pa manipula derecho di ciudadanonan di e pais aki.

Awor ta mesun cos den caso Avestruz, caminda Fiscal Gerritschen ta sigura abogado di Benny Sevinger, mr. David Kock na luna di maart 2021 cu lo no tin nada concreto contra di e politico aki te cu luna di september, awor di repente cu eleccion a wordo avansa cu 3 luna, ata Ministerio Publico hungando su weganan di abuso atrobe.

Gerritschen a papia di trahamento di dossier a base di informacionnan ricibi for di tanto testigonan como acusadonan y ta prome biaha den historia cu e dossier aki a keda cla den un tempo asina corto te cu a bay over na detencion di Benny Sevinger.

Loke ta laga un sabor amargo y un sentido di falsedad di parti di Ministerio Publico, t’e hecho cu e fiscalnan aki sa drommelsgoed cu e caso aki lo no ta cla pa worde presenta den Corte di Prome Instancia prome cu dia 25 di juni 2021 y sabiendo esaki, Ministerio Publico a dicidi di tog mete su mes den e ambiente politico, dunando servicio un biaha mas na partido MEP.

No tin logica den e maniobranan di Ministerio Publico y si ta berdad mes cu a dicidi di trece un grupo di recherche di RST pa tin yuda e caso aki, tampoco e caso lo ta cla pa bay Corte prome cu eleccion.

Lo no ta mas prodente e ora pa Ministerio Publico haci su trabou y evita e tipo di tension politico cu el a causa diaranson ultimo pa interes y bienester general?

Mester manda un advertencia di precaucion pa Ministerio Publico cu su forma di procede politico, pa evita e tipo di maniobranan aki, creamento di e tipo di tensionnan aki, ya cu tin un dicho na Papiamento, Fiscal Gerritschen en Co., “macacu ta hunga su yiu te ora cu e saca su wowo”!!