OM na Hulanda tin sirkulashon di dòlar na Surnam paralisá!

PARAMARIBO – For di aprel 2018 outoridatnan anti labamentu di plaka na Hulanda a konfiská un botin di 19,5 mion euro ku Banko Sentral di Surnam a manda Hulanda pa konverti e plaka na dòlar i sirkulá esaki te yega su destino final na Hong Kong kaminda lo a re-distribui e plaka via “geldwisselkantoren” na Hulanda.

Despues ku outoridatnan a konfiská e plaka, bankonan privá na Surnam a demandá Ministerio Publiko ulandes i for di e tempu ei e kaso a keda pendiente pa Korte Supremo tuma un desishon riba destino dje plaka.

Nan a keda di duna veredikto ayera, pero awor a fiha e fecha na 6 di yuli. Korte Supremo na Hulanda nunka ta duna motibu dikon nan a posponé e fecha i ta dia nan hiba di gana nan ta duna veredikto.

E abogado di Gobiernu di Surnam, Gonesh ta komprondé ku Korte Supremo ta masha okupá ku kantidat di kaso i ku nan no tin alternativa sino di warda numa.

E bankonan na Surnam ta desmenti ku nan ta laba plaka via geldwisselkantoren, pasobra ta Banko Sentral di Surnam a organisá e transakshon pa dje forma aki haña dòlar Merikano kèsh ku ta masha skars na Surnam.

Bankonan na Surnam tin problema pa paga loke nan ta importá for di Merka, e asina yamado “correspondent banken”, pasobra nan ta kumpliendo al pie de la letra i e sistema di kontrol di Gobiernu di Surnam no t’asina efisiente.

Den Korte na Haarlem e bankonan partikular a haña rason, pasobra ta bou di kapa di Banko Sentral nan a manda e plaka Hulanda i a ordená Ministerio Publiko pa restituí e plaka inmediatamente loke no a sosodé  pasobra nan a apelá e desishon.

Ministerio Publiko a bin ku e kuenta ku nan ta investigando doñonan dje bankonan na Surnam i resultado tabata ku ta euro so tabata sirkulá den kompra i benta di divisa, pero nada di dòlar.