Organisacion Women empOwering Women (WOW) ta organisa debate cu politiconan femenino

Den preparacion pa eleccion di juni benidero, organisacion Women empOwering Women ta organisa un debate cu politiconan femenino pa nan miembronan. E focus di e debate aki tabata pa duna realce na informacion cu lo yuda miembronan vota conciente durante eleccion di juni benidero.

Debi na limitacion di tempo pa cu e debate por a scoge 6 politico femenino y 6 topico di interes. Pa scoge e topiconan di interes y ken lo forma parti di e debate, miembronan di WOW a completa un encuesta anonimo.

Abase di e encuesta aki a scoge e top 6 politiconan femenino: Lisette Malmberg / PPA; Evelyn Wever-Croes / MEP; Daphne Lejuez / Accion21; Gerlien Croes / AVP; Misha Raymond / RAIZ; Marisol Lopez-Tromp / MAS.

Y e top 6 ‘Topiconan di interes”: Educacion; Medio Ambiente; Finansa Publico; Economia; Igualdad di Genero; Belasting.

E debate a tuma lugar den un sala di The Cinemas di Renaissance Marketplace, unda miembronan di WOW mes a coordina y modera e evento. Debi na limitacion pa cu internet/wifi den e sala WOW a opta pa graba e debate p’asina publica esaki riba plataforma di Facebook di WOW Aruba y haci e informacion aki disponibel pa publico.

E idea ta p’e contenido yega na mas hende muher y asina encurasha pa sa mas di e vision di cada politico femenino. Pa eleccion 2021 nos tin un total di 58 hende muher participando y e ta keda na nos pa sostene nan, asina so nos lo por yega na igualdad. Por ultimo, organisacion Women empOwering Women kier extende palabra di elogio n’e 58 representantenan femenino den politica na Aruba pa haci uso di e oportunidad pa promove y stimula mas participacion di hende muher den politica, p’asina nos yega mas serca di un representacion igual na Aruba.