Renaissance Aruba Resort & Casino un biaha mas ta ricibi e premio di ‘Best of the Best’

Renaissance Aruba Resort & Casino ta conoci pa ta lider den ofrece experencianan sin igual na biaheronan rond mundo. Recientemente TripAdvisor a anuncia e resultadonan pa 2021 di nan ‘Travelers Choice Awards’ nombrando asina Renaissance Aruba Resort & Casino, como e unico hotel na Aruba, den e categoria di ‘Top 25 Most Saved Hotels’. Esaki ta un logro importante p’e famia di Renaissance mirando cu esaki ta pa di dos aña consecutivo cu ta ricibi e nominamento importante aki.

E aña aki TripAdvisor a añadi un biaha mas e categoria di ‘Most Saved Hotels’, esaki ta un compilacion di hotelnan rond mundo cu biaheronan ta pone riba nan ‘bucket-list’ pa bishita. Asina a crea un top 25, unda cu Renaissance Aruba Resort & Casino a posiciona su mes na puesto number 11.

Aña pasa tabata na puesto 18 for di 1.4 miyon hotelnan rond mundo y e unico pa Aruba registra riba TripAdvisor. Cu e crecemento den posicion aki, Renaissance Aruba a sa di bolbe destaca y diferencia su mes cu nan servicio impecabel, acomodacion incomparabel y e flamingonan cu ta un atraccion sin igual cu renombre mundial. Di acuerdo cu sr. Paul Gielen, General Manager di Renaissance Aruba Resort & Casino; “Nos ta sumamente orguyoso cu Renaissance Aruba un biaha mas ta aparece riba e lista ‘Best of the Best’ di TripAdvisor. Un nombramento manera e ‘Best of the Best’ ta confirma cu nos ta keda riba e bon caminda y cu nos huespednan ta keda ansioso pa biaha y bishita Aruba bek. Danki ta bai na tur esnan cu a pone Renaissance Aruba riba nan lista pa biaha y cu nos por spera di yama cada un Bon Bini na Aruba y nos hotel”.