Seguridad riba lama mester keda intensiva

“Desde maart 2020 pa awe, cu duele na mi curason, mi mester bisa cu ya 6 di nos piscadonan ta perdi riba lama. Ta trata di Pau Martijn, Peter Kelkboom, Yubi Loefstok, Liang De, Junshi Feng y Xio He. Esaki sigur ta perdidanan doloroso di nos hendenan y un dolor grandi pa nan famia y amigonan.

Na mes momento cu cada perdida di nos hendenan riba lama Gobierno ta start up e buskeda necesario cu ta trece un gasto grandi cu ne. Esaki ta un punto di atencion di mi como Parlamentario y sigur di e Gobierno saliente”, na palabra Shailiny Tromp-Lee di MEP.

Tabatin bou auspicio di Minister Andin Bikker investigacion realisa pa metodonan mas eficiente pa introduci y incentiva piscador y baydo di lama en general pa garantísa nan seguridad. Durante e siguiente gobernacion sigur esaki mester ta un enfoke di prioridad pa pone e solucion den practica. Mirando e cantidad di hende cu ta perde riba lama esaki ta esencial.

Den e programa di Gobernacion 2021-2025 di MEP sigur e sector primario den su totalidad ta haya mas atencion. Entre otro e mercado popular lo sirbi pa ofrece productornan local y tin varios punto pa stimula hasta exportacion.

E creacion di un plataforma nacional lo ofrece tur productor, y piscado tambe ta den esaki, un mihor canalisacion pa trece nan puntonan dilanti.

Pa medio di inovacionnan, y den esaki e parti di seguridad riba lama sigur ta bin na remarca, lo modernisa varios aspecto di e sector primario.

“En corto lo traha hunto cu institutonan na un manera mas activo, cu conocemento di nos hendenan local, pa facilita informacion y conscientisacion. Similar n’e charlanan informativo cual fundacionnan y Kustwacht tabata duna den pasado na entre otro Centro di Pesca Hadicurari tempo mi tata Ramon Lee tabata Minister. Mester pone prioridad un biaha mas n’e partí di educación y concientisacion di e.o nos piscadornan.

Ademas dor di sincronisa informacion y procesonan necesario, por spera cu denter di poco tempo tur piscador lo sa ki tipo di aparato (manera un alarma) nan mester tin abordo, p’asina cu nan tin problema Kustwacht y otro instancianan ta haya sa. Esaki sigur por yuda minimisa perdida di nos hendenan riba lama.

Sector primario sigur ta haya su atencion special den nos plan di Gobernacion. Cu boso sostén y confiansa mi lo percura p’e plannan aki keda concretisa.

Ban uni forsa p’asina hunto nos por a logra mas. Bo kier mas detaye for di mi? Bo kier sa mas di mi ideanan pa bo causa? Sigui mi riba social media y ban hunto traha pa un futuro mas sigur riba lama.

Mi ta para pa bo! Hunto nos ta avansa y trahando hunto nos ta logra mas!”, Shailiny Tromp-Lee a finalisa.