Mayoria contribuyente a cumpli cu pago di belasting di auto

Sra. Luenne Pieters, Directora di Departamento di Impuesto (DIMP) durante un conferencia di prensa a informa con e pago di number di auto a bay den 2021.

E cifranan cu el a menciona, ta mustra cu hopi contribuyente a cumpli cu nan obligacionnan caba.

El a cuminsa pa informa cu Gobierno a dicidi di pospone ultimo dia di pago pa loke cu falta di belasting di vehiculonan di motor. Esaki tabata prome dia 30 di juni y awor el a bira 2 di augustus.

Datonan di DIMP ta mustra cu tin 88.997 mil vehiculo registra di cual e sistema ta mustra cu 71.529 a haci nan pago completo, cu ta un tiki mas cu 84%, pues esaki ta nifica cu tin 15.204 plachi cu no tin nada paga.

Di e cantidad aki mayoría ta number A (12.570), sigui pa V-car (1142); bromer (466); DT (203) y esnan cu nomber (180).

Manera semper ora di tempo di pago di number di auto, ta recorda esnan cu no ta uza un plachí number cu ta mihor pa entrega esaki, sino lo haya cobransa tog.

E aña’ki tabatin 2264 plachi number entrega dor cu nan no ta den uzo.

Den e prome periodo a saca 15.603 cobransa adicional p’esnan cu no a cumpli cu prome pago y e boet aki ta 50% di e suma cu mester a paga.

Hopi persona cu a paga via di banco, a haci peticion na DIMP pa comprobante di pago. Un total di 15.603 peticion a wordo entrega, cualnan a wordo procesa dor di tres funcionario.

Cada un ta procesa rond di 5 mil peticion. Aworaki falta rond di 4 mil peticion pa procesa ainda.

DIMP ta consciente cu tin keho di clientenan cu no a haya nan comprobante ainda.

Esaki ta debi na diferente motibo, entre otro cu tin un suma bieu habri (aña pasa), e formulario tin dato cu no a wordo yena.

Ta consciente cu tin hopi plachi bieu den circulacion, pero tambe tin problema cu espacio pa staciona autonan cu ta wordo confisca.

Por corda tambe cu DIMP a ofrece e posibilidad pa nan clientenan paga tur luna 50 florin, pa no haya nan mes den problema di ultimo ora.

Algun mil a haci uzo di e sistema aki, cu ta vigente ainda mirnado cu a pospone e fecha di pago te cu dos di augustus.

INVESTIGACION

Directora di Impuesto a contesta pregunta riba un investigacion andando, pero hopi breve pa motibo cu e investigacion riba malversacion no a finalisa ainda. Esaki t’e motibo cu e no por bay den detaye.

E caso ta den man di Recherchenan. Na momento cu e caso ta sera, lo duna pueblo e informacionnan necesario.