N.V. ELMAR cu suplica na tur partido politico

N.V. ELMAR ta haci un apelacion na tur partido politico pa durante e periodo aki di campaña electoral, ora di haci bishita den bario, pa pone hopi atencion na kabel di coriente den e area.

Durante e temporada di campaña partidonan politico ta haci bishita den bario cu truck di zonido, speaker y banderanan halto cu por ranca liña di coriente y consecuentemente tambe pal’i luz causando asina interupcion di coriente den becindario.

N.V. ELMAR tambe kier a enfatisa cu ora di lanta bandera, pa no pega esaki na tubo di metal den cercania di e kabelnan di coriente. Contacto cu liña di coriente por ta peligroso y hasta por costa bida di hende.

N.V. ELMAR ta suplica tur partido politico y campañadornan tene bon cuenta cu e haltura di speaker riba truck y tambe banderanan durante bishita den bario.