No duna CORC erfpacht riba terenonan di RdK

WILLEMSTAD – “No duna e kompania ku ke eksplotá refineria Isla erfpacht riba e terenonan na Bullenbaai i Waaigat pasobra muy probablemente si e proyekto frakasá e kompania  lo bende e tereno i Kòrsou ta keda sin ‘pito ni flouta’ dje refineria”, ta e atvertensia ku e hurista Marguérite Nahar di Den Haag a manda ayera den un Karta Habrí pa Pik Pisas i señora Ludmila Larmonie.

E Karta Habrí ku e hurista Marguérite Nahar a manda pa e dos lidernan ku ta bai forma koalishon den gobiernu di Kòrsou enkabesá pa e muy probabel promé minister Pik Pisas i su partner di koalishon ta kontené un litania di atvertensia pa no konsedé e terenonan na erfpacht pasobra praktikamente nan ta bira doño dje terenonan i komo tal nan por hasta bende nos patrimonio nashonal.

E hurista a referi na e interes general di Pais Kòrsou kontra interes di un grupo chikitu selekto ku ta representá interesnan strañero.

Estando na Ulanda pero sabiendo bon-bon ki ta pasa na Kòrsou konsiderando su anterior komentarionan riba susesonan importante den nos pais, e hurista a komprondé ku ta intenshon dje koalishon  pa sera un akuerdo ku un grupo lokal ku ta operá bou dje nomber CORC pa nan sigi operashon di e refineria i e Oil Terminal na Bullenbaai. E ta sinti ku ta su deber pa hala atenshon riba e siguiente aspektonan.

Den prensa a sali ku e koalishon nobo lo tin intenshon di sera e akuerdo ku CORC dunando nan derechi di erfpacht loke e ta desrekomendá fuertemente i e tin su motibunan. E konsekuensianan legal ku e derecho di erfpacht lo trese kune lo perhudiká Kòrsou masha hopi tantu huridikamente komo ekonomikamente pasobra den sentido huridiko CORC ta bira doño de fakto di e terenonan ku e inmobilarionan riba dje.
Den sentido ekonomiko e derecho di erfpacht aki lo forma un estorbo pa e futuro kresementu ekonomiko  ku Kòrsou mester haña ku desaroyo total di e teritorio total di Bullenbaai komo haf di tránsito   komo propiedat di gobiernu i ku gobiernu mes ta eksplota.

E scenario aki ta realista danki na e posishon logistiko di Bullenbaai riba e karetera maritimo via Kanal di Panama pa Lehano Oriente. No solamente esei sino e risiko ku ta n konsekuensia huridiko inevitabel ku CORC lo haña maneho i eksplotashon dje terminal petrolero huntu ku e teritorio maritimo ta un risiko real.

Otro risiko partikularmente importante ta ku CORC ta outorisá i tin derechi pa sera un fiansa masha masha grandi i ofresé finansistanan e terenonan di Isla i Bullenbaai komo borg. Si seguidamente CORC faya di paga e fiansa. e finansista tin tur outoridat legal à bende e borg na findishi koriendo e risiko ku e haf profundo na Bullenbaai lo por kai den man di strañero deskonosí ku geopolitikamente no ta deseabel pa Reino.

Ademas Ministerio di Defensa di Reino lo tin e obligashon pasobra nos ta den Reino, pa defendé Bullenbaai kontra intervenshon indeseabel stranhero of enfrentá akshonnan indeseabel ku estadonan di Medio Oriente. Un defensa asina no solamente ta kosta miones pasobra intervenshonnan militar ta masha kostoso sino ku e aparato militar di Reino por hañ’é ta defendé  interesnan stranhero den e teritorio di Bullenbaai.

Den tal kaso ta e kontribuyente ulandes lo tin di hinka man den pòtmòni pa paga un situashon indeseabel asina pa defendé un teritorio leu for di kas i kama te den ‘chokamata’ di Oseano  Atlantiko kaminda nan no tin arte ni parte den ningun konflikto.

Logikamente ku e habitantenan di Ulanda lo haña rabia kontra Kòrsou pasobra a hinka nan den un situashon asina.

Hulanda i Hulandesnan no tin problema pa duna asistensia humanitario pasobra por lo general  karakter di Hulandesnan ta inkliná pa hasi donashon di material na tur parti di mundu i sigur na Kòrsou. Sinembargo ora opinion publiko na Hulanda tende kuantu e grasia aki ta kosta nan reakshon lo ta negativo.

Señora Nahar a mustra tambe riba e kontaminashon ku operashon di un refineria i Bullenbaai lo kousa nèt awor ku Korte a dikta ku e situashon aki no por perdurá. I masha importante,e hurista ta puntra si e Gobiernu demishonario di Kòrsou ta realisá ki konsekuensianan huridiko indeseabel i inevitabel lo bai tin si duna CORC erfpacht e tereno i laman na Bullenbaai. CORC i su sosio brasileño lo kome nan ‘met huid en haar’.

Señora Nahar a splika finalmente ku ta bon e ke Kòrsou i nos gobiernu ku su konseho, pero ku ta nan tin ku tuma e desishon.