Amante na Inglatera ke kobra su èks amante lokal tur gastu ku el a paga pe

WILLEMSTAD – Den e dianan ku a pasa aki Hues di Korte Civil mr. P.E. de Korte a dikta veredikto den un kaso ku den hurisprudensia a haña fama di ‘hurisprudensia di koei’ (nido di amor of na bon Papiamentu ‘koei’  manera Hues mes a señalá i te akomodashon ku amantenan ta usa pa relashonnan ekstra matrimonial pa siglos kaba den nos pais).

E kaso no ta un novedat den historia di nos pais i no solamente ta interesante pa su aspektonan sentimental pasobra e ta penoso tambe.

Pasobra no ta trata di un persona ku por reklamá ku e ta poko ignorante den asuntu di derecho i obligashon den un relashon amoroso sino di un persona ku ta un sikologo profeshonal universitario ku tin un trabou bon pagá na un universidat na Inglatera.

E hòmber ku el a demanda ta biba na Kòrsou, pero despues di un relashon di 5 aña e bela di amor a paga pasobra kasi-kasi por kalifiká aktitut dje homber komo di un chulo ku no tabata traha, pero tabata biba riba kustía dje muhé kende dos biaha pa aña tabata hasi e biahe interkontinental for di Inglatera pa Korsou pa keda 2×3 luna pa aña serka su amante lokal.

E kaso ta kuminsa kaminda ku fo’i 2012 te ku 2017 e hòmber i su kerida tabatin amores durante kual kas dje homber tabata praktikamente e e nido di amor, e ‘koei’, pa nan biba nan amores. Durante ku e kerida di Inglatera tabata na Kòrsou, e tabata su mes sèn na tur sorto di kos di nesesidat diario ku e homber, pero ora e relashon a kaba, e muhé a demandá e homber eksigiendo pago di kompensashon di NAf 220.813 plus gastunan di tur e biahenan ku el a a hasi di Inglatera pa Kòrsou dos biaha pa aña 5 aña largu i tur gastu relashoná ku e biahenan aki.

E muhé a spesifiká  e sumanan i a mustra faktura pa un total di 102.632 EURO.

E suma aki e muhé a gasta na hasi rospondi, bay kome afó, bai supermerkado i hasta hiba bestia dokter i kumpra artikulo pa kas di su partner tabata pa kuenta dje muhé. Pero no ta esey só, pasobra estando na Inglatera e muhé tabata praktikamemente kría e homber i a manda na tur mas ku 62.771 EURO for di su kuenta na Inglatera manda pa kuenta dje amante lokal por paga su hipotek di kas i outo.

El a kobra e homber tambe pa 11 biahe ku el a hasi for di Inglatera pa Kòrsou den sinku aña pa un total di 13.771 EURO.

E muhé a kuminsa manda plaka riba kuenta dje amante lokal for di ougustus 2012 ku te luna ku e homber a pèrdè trabou i durante henter e periodo ku nan tabatin amores.

Hues a duna indikashon foi trempan den ki direkshon e tin intenshon di dikta veredikto.

Esta: No tin base legal pa duna e èks amante rason. Un kos ambos parti tabata di akuerdo ku otro, esta, ku e muhé no tabatin obligashon pa yuda e partner finansieramente, pero a manda sèn di su propio boluntat.

Tambe nan tabata konsiente i di akuerdo ku unabes ku e homber a pèrdè trabou, ‘làrgent, green back, florin’ tabata skars.

SARKASTIKO                      

Ku tur respèt pe interpretashon i dignidat dje Hues, e opservashon ku el a hasi di e relashon aki no ta muchu diferente ku e gran mayoria di relashonnan ekstra matrital kaminda e partnernan ta apoyá otro ku sèn, pero kaminda esun ku mas ‘moda’ ta kontribui mas tantu ku esun ku menos moda.

Solamente ku den e kaso aki te muhé tabata praktikamemnte kría e hòmber.

Summa summarum mester a konklui ku no tin lei den nos sistema ku ta regla ku na final di un relashon èksra marital e partnernan tin ku saka sòm i saka kuenta.

Ku otro palabra: T’e muhé tin ku proba ku tabata eksisti un areglo kaminda e èks partner na Kòrsou ta obligá di hasi kuenta i paga bèk.