Diabierna 11 di juni pa 7or di anochi lo tin un debate politico tocante medio ambiente na Cas di Cultura

Dia 25 di juni proximo pueblo di Aruba lo bolbe urnanan electoral pa deposita nan voto pa nan representante den Parlamento (y Gobierno). Un tema cu ta toca nos tur y cu ta di suma importancia ta nos medio ambiente. Plannan di maneho tocante nos medio ambiente ta instrumental pa nos pais, mirando cu esaki nan tin efectonan profundo riba nos bida y salud.

Con nos ta trata nos medio ambiente ta impacta tambe nos economia turistico, cual ta depende di un medio ambiente sano y sostenibel.

E infrastructura di nos pais ta mustra con nos no a tene cuenta cu nos naturalesa. E efectonan di nos maneho di desperdicio a resulta den e problema nacional di Parkietenbos. Con ta para berdaderamente cu proteccion di nos flora, fauna y bida marino? Con cambio di clima lo afecta nos isla y henter nos comunidad?

Den e debate lo purba di trece dilanti e diferente retonan di medio ambiente cu Aruba ta enfrenta awendia y retonan cu nos lo enfrenta den futuro.

Riba e anochi aki cada partido politico lo por trece nan vision, mision y solucionnan riba cada tema padilanti. Asina e pueblo en general por saca afo si nan tin un plan balansa entre desaroyo economico y conservacion y proteccion di nos medio ambiente.
Nos medio ambiente tin balor sumamente importante, nos mes como comunidad mester pone mas atencion y precaucion y tambe responsabilisa nos gobernantenan pa e futuro di nos medio ambiente.

E debate ta organisa dor di un grupo di varios persona activo riba e tereno di medio ambiente entre otro e team di Aruba Life Organics, Metabolic Foundation y Zero Waste Aruba.  E temanan cu lo ta riba mesa riba e debate aki: ‘Energia’, ‘maneho di desperdicio’, ‘cambio di clima’ y por ultimo ‘flora, fauna y bida marino’.

Pa mas informacion por subi e pagina di facebook Debate Medio Ambiente. N’e debate tur protocol di DVG lo ta vigente y lo wordo re-enforsa.