Premier Evelyn Wever-Croes a otorga yabi di 71 vivienda na Kiviti

Gabinete Wever-Croes hunto cu FCCA, un parti clave cu a yuda realisa e proyecto aki, a otorga yabi di 71 vivienda na Kiviti, San Nicolas recientemente.

Aki ta trata di un tereno cu ta conta cu 60,000m2 .

E proyecto completo ta consisti di 4 fase total – e prome fase a consisti di 50 cas cu ta ful cla caba y e siman pasa e di dos fase di e proyecto a wordo finalisa.

Fase 2 ta consisti di 71 vivienda, kiermen 71 famia cu hogar propio awor.

Fase 3 y 4 ta den proceso di wordo desaroya ainda y lo conta cu mas o menos 35 cas acerca.

Premier Evelyn Wever Croes su splicacion ta cu e casnan a wordo construi cu tecnologia moderno y menos gastoso p’asina haci e prijsnan mas acesibel.

Gobierno ta trahando riba mas tereno y asina aporta na FCCA den mas construccion di casnan den futuro.

Ademas di casnan social FCCA ta ofrece casnan pa cumpra y huur den rango di prijsnan rasonabel y ademas ta bende tereno tambe cu lo por wordo uza pa contruccion propio/priva.

Evelyn Wever Croes a manda un mensahe di agradecimento na tur esnan envolvi incluyendo FCCA, contratistanan, stakeholders y departamentonan di Gobierno cu ta haciendo nan mihor esfuerso pa realisa e proyecto aki.