Retiro di trahador for di Serlimar tabata sin base pa Corte

Recientemente tabatin decision den un caso cu un empleado di Serlimar a cuminsa den Corte pa motibo cu e no tabata di acuerdo cu su retiro. Esaki a pesar cu e tin 8 aña na cas cu “vrijstelling van dienst”, pasobra e ta malo. E tabata un caso cu e empleado a gana riba motibonan tecnico.

Durante tratamento di e caso dia 23 di april ultimo, ningun di dos partido tabata presente den sala di Corte, pero solamente nan abogado a bin atende cu e caso. E homber en cuestion ta traha como supervisor tecnico na Serlimar te ora cu dado momento el a yama informa cu e ta cu AO, pues malo na cas y esaki na final a conduci na su carta di retiro.

E doño di trabou, esta Serlimar a bisa cu desde 24 di augustus, 2011 e tabata AO den forma continuo, mientras cu duracion maximo pa “vrijstelling van dienst” debi na malesa a yega, cu ta permiti pa leynan laboral.

E empleado a bisa cu no tabatin un examen medico, pasobra ningun momento el a duna permiso p’esaki n’e dokter di seguro di APFA. Ningun caminda ta aparece cu e empleado a haya un ordo di autoridad concerni pa pasa den un control, esta un examen medico. Esaki ta motibo cu e empleado a dicidi di apela e decision di Serlimar ya cu e no tabata di acuerdo terminacion di su trabou dor di gerencia di Serlimar.

Raad den caso di ambtenaarnan a pone den e sentencia cu ley ta permiti un funcionario publico pidi ‘vrijstelling van dienst’ pa malesa, inclusivo e prolongacion, cual ta en total cuatro aña. Si na final di e periodo aki tin un carta di un comision medico cu e no por sigui haci su trabou, ta dun’e su retiro, mientras cu ley ta bisa si debi na su malesa, e ta den condicion cu e no por sigui haci su trabou, ta dun’e su retiro.

E doño di trabou ta bisa cu e empleado a wordo yama pa control medico, pero e no a duna permiso p’esaki tuma lugar.

E carta di APFA di dia 6 di september 2016 no ta bisa nada di e splicacion di doño di trabou. No tin copia di un carta cu a manda p’e empleado pa haci e control medico.

Decision di Corte a resulta na fabor di e trahador di Serlimar, declarando e retiro nulo.