Tiramento na San Nicolas a laga 4 persona herida

Cu tin hopi arma di candela na Aruba a keda confirma un biaha mas e fin di siman aki. T’asina cu diadomingo madruga pa mas o menos 12:15 dos persona ta presenta na Warda di Polis na San Nicolas cu herida di bala y dos na Prome Auxilio na hospital.

Esnan cu a presenta na Warda di Polis San Nicolas ta conta cu un rato prome aparentemente un Nissan March lo mester a pasa dilanti American Bar na San Nicolas y los tiro riba un grupo di persona para pafo.  Nan ta sigui conta cu nan ta total 4 persona cu lo mester a haya herida di bala.

E dos nan cu a presenta na Warda di Polis a bay InSam pa tratamento medico y despues por a bay cas.

E otro dos personanan cu a presenta na Prome Auxilio na Dr. Horacio E. Oduber Hospital cu herida di bala a wordo atendi di biaha y nan si a keda interna. Nan situacion ta stabil.

Patruya Policial a bay n’e sitio di e sucedido y Recherche a presenta p’asina haci nan investigacion. Slachtofferhulp tambe a presenta. Cuerpo policial ta pidi encarecidamente esnan cu sa algo of a wak pa yama e tiplijn di Polis cu ta 11141.