Campaña 2021 ta birando despedida di Andin Bikker for di circulo politico di Aruba

Minister di Husticia demisionario Andin Bikker no a logra su obhetivo di subi lista di partido MEP, su unico opcion politico pa eleccion di 2021 y debi n’e decision di e líder di MEP, Evelyn Wever Croes di manda su Gobierno cas na luna di maart ultimo, su tempo pa tuma un decision concreto pa su futuro politico, a cay na awa.

Andin Bikker, kende tabata líder di su propio partido Democracia Real, a dicidi pa elección di 2017 pa uni su mes n’e partido nobo di POR di Otmar Oduber, caminda el a ocupa e di dos puesto riba e lista pa elección, pero cuater aña despues, POR no ta ni sombra di e partido cu a bay eleccion na 2017 y caminda a logra dos asiento.

E tempo ey despues dia hiba un lucha formal cu a termina den Corte, Bikker a hiba un lucha pa mantene su partido cu el a funda, Democracia Real pa di su maneho ora cu Alonso Tromp a trata di tuma tur cos over, pero no a logra den e intento aki.

Un sorpresa grandi Bikker a crea ora cu el a dicidi di uni su mes cu Otmar Oduber y Marisol Lopez Tromp, pa lanta partido POR, cu e ilusion cu nan lo por logra entre cuater pa cinco asiento p’asina hunga un rol grandi den gobernacion di e país.

Sinembargo POR a logra di haya un asiento y un restzetel pa un total di dos asiento, pero Andin Bikker mes a mira su popularidad cay formalmente for di tempo cu e tabata líder di Democracia Real, caminda el a logra 1086 voto y caminda nos solamente el a cay den voto, pero e líder di POR, Otmar Oduber tambe a cay cu casi 50% den su total di votonan y mesun cos a sosode cu Marisol Lopez Tromp.

Formando parti di Gabinete Wever Croes, Bikker como miembro di POR a bin haya su mes dado momento birando líder interino di POR ora cu Otmar Oduber a dicidi di retira como Minister y como líder di e partido blau, lagando e partido den man di Bikker.

Na su turno Bikker, despues di a haya un confrontacion formal cu ex colega di POR, Marisol Lopez Tromp, tambe a dicidi di pasa liderazgo di e partido den man di Alan Howell y no a divulga su intencion riba su futuro político na tempo, pero tabatin indicacion cu e tabata den dialogo cu partido MEP.

Den seno di e partido geel tabatin resistencia pa Bikker subi lista di e partido y ora cu a bira conocí cu e lo ta den e prome diesnan, Bikker a dicidi di sinta un banda e eleccion aki, pero a anuncia su decisión di campaña pa partido MEP, yudando dos candidato di e partido.

Pa hopi e desaroyo aki y e decisión cu el a tuma pa no participa e biaha aki den e proceso electoral, t’e final di su carera político mirando e hecho cu p’e proximo periodo di gobernacion, e por hunga un rol solamente for di loke lo bay bira su ofishi nobo den e sector priva.

Un situacion cu poco a logra di lanta cabes bek despues di keda leu di política pa un tempo asina largo y no solamente hopi ta kere cu Bikker a perde su partido Democracia Real, pero cu el a pone su futuro politico tambe den un situacion delicado caminda practicamente lo ta difícil p’e recupera e sosten cu el a conta cune pa hopi tempo di tres eleccion electoral. Fungiendo como Minister di Husticia, Bikker a logra su soño tan anhela cu e tabatin como político, pero na mes momento e propio soña aki y formando parti di un partido POR cu for di su salida no a mustra cu e lo tin un futuro stabiel, su carera político awor ta na un asina yama “crossroad” cu poco perspectiva pa su futuro politico.