Fundacion Stimami Sterilisami mester suspende su actividadnan pa aña 2021

Fundacion Stimami Sterilisami lo mester suspende su actividadnan pa aña 2021 te ora e organisacion por ricibi fondonan nobo di contribuyentenan di antemano y futuro p’asina por continua cu su

campaña nacional di sterilisacion.

E programa cu a wordo inicia y pa gran parti financia dor di Bucuti & Tara Beach Resort y a wordo sosteni dor di otro organisacionnan, a logra sterilisa aproximadamente 26.397 cacho y pushi entre 2016 – 2021. Aunke esaki ta un logro grandi, ainda e fundacion mester keda traha duro p’asina e por logra su mision di resolve e problema di sufrimento di cacho y pushi riba caya den e proximo 5 añanan.

Awor mas cu nunca e esfuerzonan di Stimami Sterilisami ta necesario pasobra nos ta sigui wak mas y mas cacho y pushi riba caya, abandona y sin doño. Hunto cu e responsabilidad di cada doño riba e mantencion y cuido di nan bestia, sterilisacion ta keda e metodo di mas efectivo y compasiona pa reduci e number di cacho y pushi abandona.

Sin sterilisacion, pushinan lo por haya te cu 60 pushi baby den un aña, y cacho lo haya te cu 28 puppy den un aña. Esaki lo deshaci tur e trabou duro cu Stimami Sterilisami a haci pa baha e cantidad di sufrimento experencia dor di tantisimo animalnan riba nos isla.

Desafortunadamente e donacion personal di AWG. 100.000 di Ewald Biemans, doño/CEO di Bucuti & Tara y Presidente di Stimami Sterilsami, y un donacion di AWG. 10.000 di Aruba Bank no ta suficiente p’e fundacion por continua pa resto di 2021.

“Nos a sigui lo mas cu nos tabata por e aña aki y nos a busca tur manera pa recauda fondo, pero lamentablemente e gastonan ta sigui, pero e fondonan no ta drenta,” Ewald Biemans ta splica. “P’e rason aki nos a dicidi di suspende nos actividadnan te cu aña 2022 p’asina nos por purba recauda lo mas cu nos por durante e temporada aki.”