Johnny Scharbaay cu un tributo na Chick Corea

Cas di Cultura tin e grato placer di presenta den e siguiente Music Exposure, Johnny Scharbaay Jazz Trio.

E biaha aki cu un programa hopi special y cerca di Johnny su curason, esta un tributo n’e conocido gigante di jazz Chick Corea kende na februari ultimo a fayese, sinembargo lagando un repertorio di musica impresionante atras, manera e conocido jazz standard “Spain”.

Johnny Scharbaay a yega di haya les di Chick Corea, kende a comparti hopi musica cu’ne. Chick Corea tabata frecuenta Aruba hopi, no solamente dunando concierto desde añanan ’80 den entre otro e Aruba Jazz & Latin Music Festival, pero tambe na varios ocasion den e auditorio di e barco Freewinds. 

Musiconan profesional, esta Johnny Scharbaay riba piano, Jeremy Bonariba riba drum y Reno Steba riba baho, lo trece un concierto di halta calidad diadomingo 6 di juni pa 4pm na Cas di Cultura. Apoya nos musiconan local cu tur dia ta yuda engrandese e aprecio pa musica y arte y cu haci bida un tiki mas bunita pa medio di musica. Carchi ta obtenibel na Cas di Cultura (582-1010) y cerca Johnny Scharbaay (594-7050), sinembargo e cantidad ta limita ainda en conneccion cu distancia social di protocol di Covid-19.