Recuperacion di turismo ta sigui crece y ta den bon direccion

Director di ATA Ronella Croes pa algun tempo caba a bin ta dunando noticia alentado den henter e pandemia di Covid, cu turismo a cuminsa lanta cabes atrobe y ayera Minister d Turismo demisionario, Dangui Oduber, a anuncia cu turismo di Aruba a recupera cu 79% den luna di mei cu a caba ayera.

E sector turístico cu sin duda ta sumamente importante den e proceso di recuperacion economico, ta mustra di ta riba e bon caminda, pero cu ainda falta un caminda largo pa bay, pero na mes momento tin cu pone atencion n’e situacion di trahadornan den e sector aki.

Varios di e hotelnan cu durante di e pandemia a sera nan porta, pero cu a cuminsa opera, a haci uso di Fase y di subsidio di salario, caminda trahadornan tabata cobra 60% so di nan salario loke ainda t’e caso awendia.

Tin varios hotel cu pa algun luna caba tin un grado di ocupacion cu a supera nan propio expectativa cual sin duda ta un bon señal den henter e proceso di recuperacion, caminda e mercado Mericano, un biaha mas t’asina esencial p’e recuperacion sumamente importante aki.

Director di ATA, Ronella Croes  siman pasa a anuncia otro bon noticia cu mester cuminsa prepara pa turismo crucero cu tambe lo bay reanuda su actividadnan caminda Aruba tambe ta wordo mira como un isla pa bishita n’e momentonan aki.

Aruba pa algun luna caba ta ser mira como un isla hopi safe pa loke t’e pandemia y turistanan Mericano ta sinti nan mes comodo cu e cifranan na Aruba a desminui formalmente y nos ta ser mira como un destinacion turístico di confía pa miles di nan.

Tur esaki ta bon noticia, noticianan alentador y cu ta brindando un prespectiva sumamente positivo p’e recuperacion economico cu tanto ta ser papia di dje.

Sinembargo den e proceso di recuperacion positivo aki, tambe tin cu bay atende e situacion di trahadornan den e sector turistico, caminda hopi a perde nan entradanan custumbra y nan mester a biba cu menos entrada mescos cu miles di otro tambe a haya nan mes aden den e pandemia aki.

Den e proceso di recuperacion turístico aki, e trahadornan ta forma parti esencial di e proceso aki y mescos cu tin noticia alentado pa cu turismo, e momento a yega tambe pa trahadornan den e sector aki recupera loke ta nan salario p’esaki tambe conoce e proceso di recuperacion mirando e rol esencial cu nan ta hunga den henter e asunto aki.

Ainda tin algun hotel cu ta pasando den un proceso di restauracion di nan kambernan y cu no a cuminsa ricibi bishitantenan ainda, pero tin varios hotel grandi cu a conoce ocupacion halto den ultimo lunanan y sin duda e desaroyo aki tambe tin cu percura pa un cambio den e parti salarial di e trahadornan.