Veiligheidshuis a papia di uso di droga bao di hobennan y e lista largo di espera den cuido mental

Recientemente a tuma lugar un reunion riba nivel halto (hoogambtelijk overleg) di Veiligheidshuis Aruba den presencia di Prome Minister, Minister di Husticia y coordinador y partnernan di Veiligheidshuis. Prome Minister ta Presidente di e hoogambtelijke stuurgroep.

E reunion di trabao a bay den bon esfera. E partnernan di Veiligheidshuis a haci uso di e hoog bezoek pa bolbe enfatiza e balor adicional di e cooperacion entre e cadena di cuido y e cadena hudicial. E forza di Veiligheidshuis ta sinta den e lazonan di cooperacion entre e partnernan ora di traha cu personanan cu multi-problematica social.

Den e reunion a papia di e dificultad y challengenan cu cual e partnernan ta wordo confronta, manera (por ehempel) e crecemento preocupante di uso di droga bao hobennan, e listanan largo di espera den cuido di salud mental y e destino di personanan ilegal cu mester ayudo.

Banda di e cantidad di problema cu tin, tin cosnan bon tambe ta sosode, aunke e progreso ta bay hopi biaha den stapnan masha chikito. Halto riba agenda tin para vivienda guia y protehi especialmente pa hoben y personanan vulnerable. Un otro prioridad ta psicologonan pa tratamento di problematica mental bao hobennan.

Meta di Veiligheidshuis ta traha na seguridad na Aruba dor di preveni y baha recidive, molester y criminalidad.

E partnernan fiho di Veiligheidshuis ta Ministerio Publico, Cuerpo Policial di Aruba, Departamento di Asuntonan Social, Departamento di Voogdijraad, Reclassering, KIA, Bureau Slachtofferhulp, Bureau Sostenemi, Fundacion Guia Mi, FMAA (Fundacion pa Maneho di Adiccion), Respaldo, Wit Gele Kruis, Sociaal Psychiatrische Dienst, FCCA y Bureau Leerplicht.

Tin tambe e partnernan flexibel. Entre nan (por ehempel) Fundacion Contra Violencia Relacional, Orthopedagogisch Centrum y Schoolmaatschappelijk werk.