Buscando con Benny Sevinger a construi su cas di dos kamber y con el a yega na bloki cu tegelnan

Caso Avestruz a hinca Ministerio Publico den un skina sumamente difícil, sigur ora cu esaki ta mustra di ta un skina político, caminda mescos cu na 2017, e institucion aki a presta su mes, kisas deliberadamente of kisas, den un lucha político den un campaña electoral.

Na 2017 tabata e caso contra Paul Croes y awor net den porta di eleccion, Ministerio Publico pa su propio Fiscal, despues di a confirma cu e caso aki lo no ta cla te cu luna di september 2021, awor di repente na mes momento cu fecha di eleccion a wordo adelanta, ata Ministerio Publico a dicidi di mete su mes den mesun campaña electoral, insinuando cu esaki no t’e caso.

Tur cos den e caso Avestruz a wordo adelanta, pero contrario na 2017, e caso contra di Parlamentario Benny Nisbet, a surti otro efecto político caminda un duda grandi a cuminsa crece den comunidad di e intención real tras di e investigación contra di Sevinger.

Un caso caminda ainda no tin nada concreto di tur loke Ministerio Publico ta pretende, pero caminda mas tanto ta hibando un campaña cu por wordo considera di teror pa forsa sospechosonan basa abou contra di un político, kende hasta den su periodo como mandatario, den su calidad como Vice Prome Minister di país Aruba, a yega di representa Hulanda hasta na varios ocasion.

Ministerio Publico sinembargo ta ripiti e mesun maniobranan cu el a  haci den e investigacon contra di Paul Croes, forsando testigonan pa bisa algo cu lo por wordo usa den un caso penal contra di e político y tur cos ta mustra cu ta mesun situacion awor den caso di Sevinger.

Autoridadnan di Landsrecherche ta piscando, buscando un forma pa haya algo robes cu cosnan di e político aki, kende ainda ta detene for di siman pasa diarazon, caminda Ministerio Publico por sigui prolonga e detencion aki den tempo di campaña, sin realmente tin hustificacion p’esaki.

Ya caba a pone presión riba esposa di e político y asina riba otro funcionarionan cu a yega di traha na oficina di Sevinger y tur cos ta mustra cu  ta piscando pa haya algo cu no ta bon cu e ex Minister di Infrastructura.

Na cas di Benny Landsrecherche a bay na varios ocasion den buskedanan di cas, buscando pa haya sa kico y con Sevinger a yega na su tegelnan cu el a pone den su cas, pa como no un mansión, pero un cas di dos kamber, check ki tipo di bentana a wordo instala, ki tipo di bloki a wordo usa, kisas buscando si e materialnan aki, pa un cas cu ainda e político ta trahando riba dje, lo por tin algo cu nan por usa penalmente contra di dje.

Tur hende cu conoce Benny, prácticamente den su tempo liber, ta bon na altura cu e político semper ta haciendo trabou di construccion riba su mes, un ofishi cu el a studia y por bisa cu nunca el a usa un contratista pa  traha su cas.

Pa mustra di con Ministerio Publico ta ser cuestiona den su forma di procede, tin cu señala acusacionnan entrega pa por ehempel e político Melvin Tromp, caminda el a presenta recibonan cu oficina di abogado di tata di Prome Minister Evelyn Wever Croes, a ser previlegia p’e Gobierno di e líder di MEP, pero cu Ministerio Publico no a considera cu tin algo malo na esakinan.

Sinembargo contrario na construcción di BennySevinger su cas, e oficina di abogado aki a construi un edificio nobo nobo den 2020, den mesun tempo cu a entrega keho cu recibonan cu ta alcanza miyones di florin pa trabounan cu Gobierno di Evelyn a laga haci.

Henter mundo sa cu e Prome Minister demisionario tabata traha na oficina di abogado di su tata, a yega di atende casonan den Corte p’e oficina aki tempo cu e tabata miembro di Parlamento den oposición, pero e tipo di construccionnan aki, simplemente no tin interés di Ministerio Publico y ta cosnan cu den comunidad, a cuminsa cuestiona formalmente.