Global Money Week Aruba e aña aki ta organisa The Classroom Edition

Aportando na educacion financiero na Aruba den ultimo tres aña, Banco Central di Aruba (BCA) anualmente ta organisa un programa nacional di Global Money Week Aruba (GMWA), conhuntamente cu socionan di institutonan financiero y Gobierno.

Pa por a organisa GMWA – The Classroom Edition, cu ta dirigi na muchanan entre 10-12 aña, e aña aki BCA a colabora cu Banco di Caribe, ENNIA Aruba, Guardian Group Fatum, IDEA (Gobierno di Aruba), Kiwanis Club of Aruba, Museo Arqueologico Oranjestad Nacional Aruba, y Qredits.

GMWA su meta ta pa fortifica educacion financiero y promove inclusion financiero atrabes di nos hobennan, y stimula nan den un manera explorativo y interactivo pa siña tocante concepto y abilidadnan financiero.

Pa 2021, e enfoke ta pa organisa un version digital den klas cu e studiante y docentenan, referi como “the Classroom Edition”. Lo ehecuta e Classroom Edition akiden klas dor di varios scol cu ta participando, incluyendo e scolnan basico Colegio Sagrado Curason y Reina Beatrix.

E Classroom Edition lo cubri tres (3) tema, cual ta: (1) Gasta y Spaar, (2) Gana placa, y (3) Comparti. E temanan aki lo cubri e importancia di presupuesta y spaar, empresario, y duna bek na comunidad. Studiantenan lo ricibi lectura digital riba e temanan aki den klas y lo traha riba tareanan y presentacion den grupo. E tres grupo cu e miho contenido lo gana un premio. GMWA ta desea tur studiante participando hopi exito cu e proyecto.

BCA y GMWA kier a tuma e oportunidad aki pa gradici Colegio Sagrado Curason y Reina Beatrix Basisschool pa nan participacion y na tur socio pa nan colaboracion y compromiso continuo na Aruba su educacion financiero. Pa mas informacion tocante di GMWA por bishita y sigui nos riba e Facebook y Instagram page di GMWA ‘Global Money Week Aruba’.