Na Hulanda Gobierno di acuerdo pa aumento salarial di 1.3% y un bonus di 750 euro

Gabinete Wever Croes cu Minister Presidente Evelyn Wever Croes na cabes, a mishi cu salario di tur trahador publico y oficialnan di Polis tambe a wordo sorprendi ora cu segun e líder di MEP, nan tambe mester haci un sacrificio pa yuda esnan cu a perde nan salario durante di pandemia.

Cuerpo di Polis di Aruba asina a bira e unico Polisnan den Reino Hulandes, cu mester a entrega parti di nan salario y mester a entrega parti di nan beneficionan secundario ya cu segun e lider di MEP, nan mester ta solidario tambe cu trahadornan cu a perde nan salario.

Ningun oficial di Polis na Hulanda, na Corsou, na Sint Maarten a perde algo di nan salario den e pandemia ya cu nan tabata forma parti sin duda di e asina yama ‘frontliners’ den e lucha contra Covid 19, ariesgando nan propio salud ora cu nan tin cu actua of duna asistencia na tur momento.

Ayera mainta na Hulanda, Gobierno demisionario di Hulanda pa medio di Minister di Husticia Grapperhuis y Korpschef Henk van Essen, a yega na un acuerdo riba un CAO ‘tussentijds’ cu forsa retro-activo te cu prome di januari 2021 y cu lo ta valido te cu 31 di december di e aña aki.

E acuerdo ta duna Polisnan Hulandes un aumento salarial di 1,3% y hunto cu esaki tur Polis lo ricibi un tipo di bonus ‘eenmalig’ pa un suma di 750 euro pa cada oficial di Polis.

Ta interesante pa mustra cu Minister Grapperhuis a señala lo siguiente:
“Dat is ook een teken van waardering richting de agenten die gedurende de coronacrisis heel veel werk hebben verricht.”

Pues, mientras cu aki na Aruba líder di MEP, Evelyn Wever Croes ta exigi pa Polisnan a sacrifica parti di nan salario y beneficionan secundario, aya na Hulanda nan tin tur respet y gradicimento pa e trabou inmenso cu oficialnan di Cuerpo di Polis a duna durante di e pandemia di Covid-19, pues un reconocimento husto y na su lugar pa Polisnan.

Mientrastanto aki na Aruba, Prome Minister demisionario ainda no kier bin afo y divulga loke realmente el a firma cu Hulanda, esta cu trahadornan publico lo bay perde mas di nan salario y hopi mas di nan beneficionan secundario, caminda ta wordo anticipa cu despues di eleccion e Gobierno nobo lo tin cu ehecuta tur loke Evelyn líder di MEP a firma cu Gobierno di Reino.

El a haci esaki sin ningún momento a dialoga cu sindicatonan di trahadornan publico  y den e caso aki cu Sindicato di Polis di Aruba, pero simplemente a impone su pensamento, su forma di complace Gobierno di Reino manera cu su persona a haya ta bon, pero caminda Minister Presidente Wever Croes no a duna reconocimento n’e tremendo trabou haci pa Polisnan durante di e pandemia di Covid-19.

Kico lo bay pasa den proxmo lunanan no ta conocí, pero ainda Polisnan ta keda haya menos salario contrario na nan coleganan den otro partinan di Reino y na lugar di un reconocimento hustifica, nan ta para dilanti di un situacion insigur caminda ainda e posibilidad ta existi cu nan lo bay perde mas di nan entrada salarial y beneficionan secundario.

Ta mesun suerte cu otro funcionarionan publico tambe ta confrontando ya cu te ainda e incertidumbre di kico lo tin cu bay pasa según e acuerdo firma pa Prome Minister Wever Croes, caminda entre otro un grupo di entre 150 pa 200 trahador publico, lo tin cu wordo retira. Durante di campaña electoral aki e líder di MEP no kier papia den forma habri cu ningun trahador publico of nan sindicato, pero e sentimento cu lo tin mas medida na caminda contra di nan, ta un hecho concreto.