Parlamentario Hendrik Tevreden (MEP) ta boga pa trahadornan di casino haya pago 100%

Recientemente Gobierno a tuma e decision pa flexibilisa medidanan di Coronavirus. Un di nan ta cambio di horario di casino. Parlamentario Hendrik Tevreden ta kere cu esaki mester trece cambio p’e empleadonan tambe.

Aruba y su trahadornan a bin ta sufriendo hopi dor di e pandemia. Y danki na introduccion di subsidio di salario pa Gabinete Wever Croes I, cu e trahadornan di casino por a keda cabes riba awa y hopi di nan ta inmensamente gradici cu esaki, segun e Parlamentario.

El a tuma nota cu e vacunacion a mehora e situacion di Aruba den tal sentido cu Gobierno por a cuminsa flexibilisa e medidanan contra Covid-19. Y esaki ta brindando mas espacio pa casinonan por sigui recupera forsa economico.

For di tempo di introduccion di subsidio di salario, hopi empleado a bay atras y nan ta bogando awor, cu a pone e orario di sera di casino pa 1’or di madruga, pa considera pa cuminsa adapta e porcentahe di nan salario como empleado di casino tambe.

Na e momentonan aki SVB ta duna 60% di subsidio di salario y e doño di trabou mester duna 20%. Sinembargo el a bin ta ricibi hopi informacion di e sector aki cu e doñonan di trabou no a yega ni pa cumpli cu e 20% cu mester sali di nan saco. Esaki tin di cambia na bienestar di e trahadornan.

Esaki t’e momento, segun Hendrik  Tevreden, pa cuminsa duna e empleadonan bek loke nan a bay atras den dje durante e ultimo aña. Mas ainda, e ta bisa, pasobra turistanan a cuminsa yega Aruba den cantidad mas grandi y ta gastando relativamente mas segun informacion ricibi.

Tin varios hotel cu riba 80% di ocupacion y hasta den luna di mei tabatin uno cu casi a yega 100% di ocupacion.

Cu e situacion ta mehora ta keda ilustra tambe den e hecho cu un hotel siman pasa a gradici Gabinete Wever Croes p’e ayudo di subsidio di salario y cu nan situacion a mehora pa cual nan no mester di e subsidio di salario mas.

“Lo ta bon p’e doñonan di trabou den e sector aki, cuminsa mehora e situacion p’e empleado tambe. E sacrificio tabata pisa y awor cu e situacion a cuminsa mehora, nan mester sinti esaki tambe,” Tevreden a comenta.

Casinonan a keda sera pa un tempo y despues por a habri cu orario limita. Si calcula esaki bon, e ta ensera un diferencia di 32% menos den orario p’e casino opera, di cual e subsidio di salario duna pa Gobierno a carga te cu awor. Sinembargo awor cu a kita Toque de Queda, y a amplia nan orario di operacion te cu 1’or di madruga nos ta kere cu casinonan por aumenta na parti p’e trahadornan.

“Nos ta contento cu casino a mantene trahadornan na pia di trabou, y satisfecho cu subsidio di salario, pero nos ta spera cu e empleado tambe por sinti e cambio di orario un tiki den su salario tambe.”