Proyecto participacion di hoben: ‘To Vote, I Voice’

Heart-Centered Leadership Foundation (HCLF) ta organisa durante lunanan di juni y juli un

proyecto interactivo cu meta pa promove participacion di hobennan den proceso di decisionnan,

en particularmente pa cu e futuro di pais Aruba.

Hobennan tin hopi di comparti tocante nan experiencia, pero hopi biaha no ta wordo scucha.

Decisionnan ta wordo tuma pa nan, sin consulta nan. Cu e proyecto ‘To Vote, I Voice: Don’t

Count YOUth Out’ hobennan ta haya e oportunidad di directamente haci un impacto den nan

futuro.

Durante e 6 actividadnan di e proyecto, nan lo mira di serca e situation di 4 tema cu a wordo mas impacta durante e pandemia di Covid-19: Educacion, trabao (labor), medio ambiente y salud mental.

E proyecto a cuminsa dia 15 di mei cu un Impact Café, unda participantenan hoben entre 17 y

22 aña a ricibi presentacion di Directie Natuur en Milieu, Directie Arbeid, Directie Onderwijs y di

Sociaal Psychiatrische Dienst (SPD).

Cu e informacion cu a ricibi riba e situacion actual pa cu enseñansa, salud mental, medio ambiente y trabao, e hobennan a bay analisa e situacion di e 4 temanan y bin cu preguntanan cu nan lo kier mas claridad riba dje.

E preguntanan aki lo a wordo contesta durante un siguiente actividad, cual ta un episodio di e

podcast Vox Iuventus Impactus.

Pa motibo di retonan tecnico, no por a graba e episodio y ‘stream’ e manera ta custumbra via Facebook y Youtube. Pa por facilita e proceso, e invitadonan a bay collegezaal di EPI, unda e participantenan tabata den proceso di mira e ‘livestream’ di e episodio. Den collegezaal, den un atmosfera interactivo, e participantenan a haya oportunidad di puntra e invitadonan mas pregunta tocante e futuro di Aruba.

E invitadonan durante e episodio tabata sr. Armand Hessels di Stichting Deugdelijk Bestuur y sr. Greg

Peterson di Aruba Birdlife Conservation.

E siguiente 4 actividadnan lo tuma lugar durante di juni y juli y ta inclui un Impact Factory, unda e participantenan lo bin hunto pa siña un tiki mas di nos proceso electoral, con pa presenta nan mes, y tambe bin cu preguntanan critico tocante e 4 temanan.

Tur esaki den preparacion pa un ‘Young Voters Town Hall’ unda e hobennan lo combersa cu candidatonan di 6 partido politico cu nan a scoge pa ta presente. E ‘Young Voters Town Hall’ ta duna e participantenan e oportunidad pa puntra e candidatonan di e partidonan con nan lo maneha diferente

preocupacion cu nan tin pa cu educacion, medio ambiente, enseñansa, y labor.

E proyecto ta culmina cu 2 session unda e hobennan lo bay traha riba un ‘Youth Manifesto’. E

manifesto aki lo inclui puntonan cu nan como hoben ta haya ta importante pa nos siguiente

gobernantenan tene den consideracion ora di tuma decision cu ta impacta nan futuro. E manifesto lo ta un colaboracion di e hobennan participante.

E participantenan lo aserca otro hobennan pa lesa e manifesto y pone nan firma pa demostra cu nan ta bay di acuerdo cu e ponencianan den e documento y cu nan tambe lo kier mira e cambionan aki.

Como fundacion cu ta promove participacion y inclusion di hobennan den procesonan di decision pero tambe pa hobennan ta empodera pa laga nan bos resona, a mira e temporada di eleccion como un momento pa involucra e hobennan den e decisionnan cu ta wordo tuma pa futuro di nan pais. E proyecto ta uno interactivo, unda ta involucra profesionalnan di diferente instancia pa hobennan por haya mas informacion posibel pa por haci decisionnan responsabel y factual.

E proyecto ‘To Vote, I Voice’ ta financia dor di CEDE Aruba y Samenwerkende Fondsen Cariben. Heart-Centered Leadership Foundation a wordo funda na aña 2008 y ta trahando activamente pa empodera hobennan desde aña 2012 por medio di diferente proyecto. Por lesa mas di e fundacion riba website www.hclfaruba.org of via nos facebook page HCL Foundation.