Siña mucha di 6 pa 12 aña anda cu placa

Den mayoria cas di famia, e topico ‘placa’ no ta algo cu ta wordo papia di dje ora ta trata di educacion di yiunan. Ta mas cu cla cu e den hopi famia placa of falta di dje por ta un problema principal.

Ta importante pa mucha siña compronde e balor di placa y siña anda cu placa, pasobra placa ta hunga un rol grandi den bida di tanto adulto como mucha.

Con pa siña un mucha anda cu placa? Ki sorto di mensahe nos mester duna mucha riba e topico aki?

Naturalmente e ehempel di mayornan ta importante. Si e mayor ta keha tur ora cu tin tiki placa e mucha lo experencia placa como un problema. Si e mayor ta gasta placa pa loco y si e yiu haya tur cos cu e ta desea, e lo pensa probablemente cu placa ta algo cu facilmente ta disponibel den cas. Si ta duna un mucha ‘zakgeld’ ki ora cu ta y cu comentarionan negativo acerca, e mucha por pensa cu e no merece e placa.

Loke ta importante ta pa siña mucha maneha nan entrada y gastonan bon. Nos por yama esaki “educacion financiero”. Educacion financiero ta ensera duna e mucha poco poco mas responsabilidad pa placa.

Mayornan por papia cu nan yiu tocante asuntonan financiero di cas, specialmente kico por y kico no por den nan famia.

No mester bisa e yiunan cuanto e entrada di cas ta exactamente, pero por splica nan si algo di e entrada y gastonan di famia.

Dor di splica un mucha kico tur mester paga di e entrada e lo haya mas bista di e balor di placa. E lo no keda asombra mas cu e huur of hipoteca di cas ta, por ehempel, mil florin pa luna. Tambe e lo compronde mihor pakico cierto cos, cu ta normal na cas di un amigo, no por na su cas. Ta consehabel tambe pa laga mucha haci de bes en cuando un compra den supermercado pa asina e siña cu tur cos ta costa placa.

E BALOR DI ‘ZAKGELD’           

Zakgeld t’é manera pa siña un mucha anda cu placa. Un condicion ta cu mester trata di un suma fiho cu bo ta duna na un momento fiho. E ora ey so e mucha sa unda e ta para ora e suma aki caba. Naturalmente e suma aki ta depende di e situación financiero di e famia.

Den practica ta resulta (tambe pa adulto) cu e problema mas grandi ta pa maneha un suma minimal pa un cierto periodo. Y net esaki e mucha mester siña sin cu e mayor cai aden mucho liher dor di duna mas placa prome cu e periodo stipula a pasa.

No ta nada pa haci esey un biaha, pero no mester haci’e un custumber. Un mucha mester siña cu e placa cu e tin, mester yega pa loke e kier y tambe cu tin biaha e mester spaar pa cumpra algo.

Alabes e mester siña e diferencia entre loke nos kier y loke ta necesario realmente.  P’esey ta bon pa haci palabracion cla riba e uzo di zakgeld. Kico e mucha mes mester cubri cu su zakgeld y kico e por gasta libremente? Asina e mucha ta siña distingui diferente tipo di gasto: gasto fiho, manera pa bai landa na piscina, gasto cu ta bin bek de bes en cuando, manera regalo pa dia di mama, y gastonan liber, manera un ‘icecream’.

KI ORA POR CUMINSA CU ZAKGELD?                   

Segun pedagogonan e mihor edad ta 6 aña. N’e edad aki e mucha por compronde un tiki caba di e balor di placa. E sa por ehempel cu un moneda grandi no necesariamente ta bal mas cu un moneda chikito, e por conta caba y e sa un tiki di matematica.

Mayoria mucha di e edad aki lo gasta tur nan placa di biaha, pasobra planea ta algo cu nan mester siña ainda. Importante ta pa siña e mucha poco poco y dun’e cada bes mas responsabilidad.

For di mas o menos 7 pa 8 aña por stimula spaarmento pasobra na e edad aki e mucha ta cuminsa realisa cu pone placa un banda ta un bon manera pa despues e por cumpra algo cu e ta gusta. Percura si pa e meta no ta mucho leu pasobra e ora ey e mucha no por calcula e periodo y esey no ta haci spaarmento atractivo. Mas grandi e mucha ta, mas leu e meta por ta.

Poco poco e mucha mester siña cu bo no ta spaar djis pasobra e ta leuk, pero tambe pasobra tin biaha e ta necesario.

Por ehempel, si un biaha pa luna bo mester mas placa cu bo ta haya semanalmente. Mester guia e mucha pasobra no ta intencion pa e spaar tur su zakgeld. E intencion di duna zakgeld ta pa e mucha siña uzo placa na un manera responsabel. E lo mester siña tambe pa de bes en cuando saca un suma grandi.

MAL UZO DI ZAKGELD

No uza zakgeld como un medio pa duna recompensa of pa straf. Kiermen, no bisa: “Bo no ta haya zakgeld si bo no drecha bo kamber aworaki”. E ora ey bo ta uza zakgeld como un medio pa pone presion y no como un medio pa siña e mucha anda cu placa. Bo tambe lo keda asombra si bo doño di trabao bisa bo cu bo no ta haya pago e luna aki pasobra bo prestacion tabata menos.

Tampoco mester paga bo yiu pa trabounan normal di cas pasobra e ora ey e no ta siña cu tur hende

den cas tin tarea. Drecha mesa y drecha cama, por ehempel, ta trabaonan normal. Pa trabaonan special manera, por ehempel, laba auto lo bo por duna un pago chikito. Asina e mucha ta siña cu esfuerso extra tin recompensa.

Recompensa un raport bunita cu placa tampoco no ta un bon idea. Bon resultado riba su mes ta un recompensa caba y no ta necesario pa pone tur cos den placa. Naturalmente por haci excepcion pa un mucha cu mester haci hopi esfuerso pa yega na bon resultado. Pero un salimento special tambe ta un forma di recompensa.

KEDA CONSECUENTE

Palabra bon cu e mucha kico e por haci cu su zakgeld y kico e mester haci cune. Keda mustr’e cu tin biaha e tin cu scoge y dun’e mas responsabilidad segun e bira mas grandi. Importante ta pa e mayor keda consecuente! No cai aden mucho liher si bo ripara cu no ta bay bon y duna e mucha mas placa prome cu e siman a pasa. No ta un bon idea tampoco pa presta bo yiu placa na momento cu ela perde su cartera.  

Fundashon Pa Nos Muchanan a traduci e articulo aki for di e revista “J/M vakblad voor ouders”. Otro fuentenan ta: life.familyeducacion.com of  www.jeugd-en-geld.nl.

Pa informacion of pregunta por acerca Fundacion Pa Nos Muchanan – Cumana 2

Tel: 5834247/5880856 – Whatsapp: 6998900
E-mail: info@fpnm.aw – Website: www.fpnm.aw