SVB a desbaratá reklamo ku no ta kumpli ku veredikto di Hues

WILLEMSTAD – Banko di Seguro Sosial di Kòrsou a rechasá e akusashon di abogado Bijleveld di Boneiru di un manera fulminante ku nan no ta respetá veredikto di Hues.

Fin di siman pasá abogado Bijleveld na nòmber di Penshonadonan AOV di Kòrsou a kritika e hecho ku SVB-Kòrsou lo ta nenga di kumpli ku desishon di Korte.

Segun Bijleveld SVB no ke paga tur e grandinan bibá na Boneiru, SXM, Saba i Statia loke nan tin derecho riba dje, ounke Korte di Hustisia a dikta ku nan tin ku paga i despues ku SVB a kòrta AOV di no-residente ku 10% for di 2017.

Bijleveld: “Korte a dikta ku nan tin ku paga, pero SVB no tin kunes”.

Den un rechaso poko usual i partikularmente fulminante gerensia di SVB a informá e abogado ku no tin kuestion ku SVB ta ninga di kumpli ku veredikto di Korte.

Nunka SVB a indiká ku nan no ta respetá veredikto di Korte i e biaha aki tambe esei lo te kaso kaminda abogado Bijleveld a haña rason.

Es más, SVB a duna Bijleveld tur loke e tin derecho riba dje pero awor e ke pa SVB apliká e derechonan ei riba otronan tambe.

Esei ta diferente for di loke e ta pretendé ku titulo di su deklarashon, pasobra no ta kuestion di ninga di ehekutá e veredikto pero pa apliká  veredikto na fabor di terseronan tambe.

E terseronan aki miembro di VAC – meskos ku Bijleveld a hasi – tabatin oportunidat pa  bringa e desishon di gobiernu ku SVB mester (a) ehekutá pa apliká e deskuento di 10% riba penshun di Behes di no-residentenan i no paga bonus di Pasku.

Pa motibunan ku nan lo sa, nan no a bringa e desishon ei i p’esei mes Korte kategorikamente no a menshoná e ‘terseronan’ aki komo partido manera Korte a skirbi literalmente den e veredikto.

Ku otro palabra: kasi sigur nan a aseptá e desishon legal di deskuento òf a ninga di apliká resultado dje kaso di korte ku sr. Bijleveld a entamá pa loke ta konserni e desishon di deskuento riba nan persona.

Summa summarum, Korte no a konsiderá miembronan di VAC komo partido den e kaso i SVB no tabatin motibu pa apliká e veredikto riba nan persona.

Ademas Korte a pone sierto kondishon pa loke ta lugá di residensia durante sierto periodonan.

Pa bisa meramente ku un persona ta residensiá na tal kaminda durante tal periodo no ta nifika ku e ta biba en realidat kaminda ela indiká.

E veredikto ta di aplikashon riba señor Bijkerk, no riba otronan i papiando di verediktonan di korte: e pregunta ta dikon ta saka komunikado di prensa si (tòg) ta konsiderando akshon legal insinuando ku SVB ta ninga di kumpli ku veredikto di Korte siendo ku esei no te kaso.

Of esaki ta un intento pa influensia Korte nan desishon riba eventual futuro kasonan? Pero esei ta señor Bijleveld só por kontesta……