SVb-Kòrsou ta nenga di kumpli ku desishon di Korte

WILLEMSTAD – SVB no kier paga tur e grandinan bibá na Boneiru, SXM, Saba y Statia loke nan tin derecho riba dje, ounke Korte di Hustisia a dikta ku nan tin ku paga.

SVB a kòrta AOV di no-residente ku 10% for di 2017 y a keda sin paga nan kerstbonus for di 2016. Korte a dikta ku nan tin ku paga, pero SVB no tin kunes.

Den e veredikto Korte a indiká klaramente kual penshonadonan bibá na Boneiru, SXM, Saba y Statia tin derecho di haña nan AOV pagá kompleto manera ántes y tambe nan kerstbonus, pero den un karta fechá 14 di mei 2021,  SVB a laga sa ku nan lo NO paga nan.       

Bon, klaramente esaki no ta akseptabel. Nos ta biba ketu bai den un Estado di Derecho. Kòrsou tambe, ounke yiu di Kòrsou tin ku pensa hopi bon kiko ta nifiká ku un organisashon semi-gubernamental manera SVB ta disidí di nenga kumpli ku desishon di Korte. Awe ta nos, mañan to bosonan mes!

Naturalmente nos a kuminsá tuma pasonan kaba. Den e kuadro ei nos ta yama un reunion públiko pa diabièrnè 4 di yüni p.v. pa 19.00’or di anochi na Sala Imelda tras di Misa di Coromoto, Antriol. Nos ta invitá tur penshonado ku ta risibí AOV di Kòrsou, kompleto of parsial, pa asistí na e reunion aki. Nos lo splika ki pasonan nos por tuma y kon lo solushoná e problema aki.