Ayera mainta, color y number di partidonan politico a keda estableci

Ayera mainta durante un sesion oficial, Conseho Supremo Electoral a numera y a duna color ne 12 partidonan politico cu ta participa n’e proximo eleccion di dia 25 di juni proximo.

Cada partido por a saca un lot cu e respectivo number, y despues a sigui cu e establecimento di e colornan.

Tin partido cu tin esaki estableci caba desde eleccion anterior, y tin esnan nobo cu mester a scoge y entre esakinan a tira lot.

Mirando cu tabatin algun partido cu casi e mesun color, mester a haci diferencia den esaki. Esaki t’e numeracion y e color cu e partido ta haya pa cu e stembiljet, cu awor lo bay wordo imprimi.

Prome partido ta ACCION21 a haya grijs cla, E di dos PPA cu color oranje, sigui na di 3 lugar MAS = blauw cla, sigui pa nr. 4. UPP color cora,  MEP na di 5 lugar cu su tradicional color geel, Partido HTC a haya nr. 6 cu color roos cla, na di 7 lugar POR c color blauw scur. AVP a haya nr. 8 cu su color berde, sigui pa nr. 9, cu ta Pueblo Prome, cu a haya color biña cla, sigui pa CURPA  cu nr.10 cu color biña scur, nr. 11 ta partido  RAIZ cu color grijs scur y RED a bira partido nr. 12 y a haya color blanco.