Kico ta bay haci cu Lotto mester bira pregunta pa partidonan durante e Debate Politico awe nochi

Pueblo, particularmente mundo di deporte, kier sa cuanto exactamente Fundacion Lotto pa Deporte (“Stichting Publico”) a paga Canadian Bank Note (“CBN”) na comision durante 2012-2020.

Ta ora pa Lotto pa Deporte aplica “good corporate governance” dor di ta sincero y transparente pa cu e comision cu nan a paga na CBN. No por tin secrecia cu patrimonio di pueblo.

Ta papia di casi un cuarto parti (25%) di e benta bruto di loteria y catochi ta bay pa CBN. Bruto kiermen promer cu kita belasting y tur otro gastonan. Sin di ta experto den e materia aki, esaki ta parce un comision hopi halto mes!

Awel, ta surgi e pregunta lógico: Basa riba cual estudio profesional Lotto a firma e contracto lucrativo aki na 2011 cu CBN anto? 

T’e mesun hendenan den actual Hunta di Supervision di Lotto pa Deporte a firma e contracto di maneho aki cu CBN debi cu bou di nan comando Lotto a casi bay “failliet”.

Den otro palabra ta ki estudio profesional a wordo usa pa hustifica un comision di casi 25%? Ta ki conseho profesional a wordo pidi prome cu a firma e contracto aki na 2011?

Mester compara ta cuanto placa Lotto a duna deporte y cuanto placa a bay pa CBN durante 2012-2020. Tambe ta surgi e pregunta pakico e rebenderonan no por haya mas comision, mirando cu nan tin cu paga BBO riba nan comision y awendia nan mester inverti mas placa den seguridad.

Ta pesey mes na caminda pa eleccion 2021 a yega e ora perfecto pa e partidonan politico exigi cuenta na Lotto y cu tur nan rason. Loke e Gobierno actual te ainda no por a logra durante 4 aña largo.

Mirando e ‘black box’ den Lotto pa Deporte y e discusion si deporte realmente ta hayando su ‘fair share’ partidonan politico tin cu presenta na pueblo nan vision y maneho pa cu deporte. 

Esencial ta si e modelo di maneho firma entre Lotto y CBN na 2011 t’esun mas faborabel pa deporte.

Di otro banda, tin e aspecto cu mester echt lanta un otro fundacion di loteria aki na Aruba o mester reorganisa Lotto por completo.

Ta di spera cu e topico di deporte y Lotto bin padilanti den e debate politico entre e partidonan participando na elección 2021.  E proximo Gobierno mester laga haci un investigacion profundo di maneho den Lotto pa Deporte. No tin awa pa laba.