Pandemia a trece reto pa Cortenan, pero tambe experencia

Jacques Keltjeus (Vice Presidente di Hof) hunto cu Persrechter Debby Angela y Ernesto Kross, Manager di e sede na Aruba, a tene un conferencia di prensa unda a duna relato anual di Hof. Un relato cu tur tres tabata di acuerdo cu e Pandemia tabatin su influencia, pero tambe a trece aspectonan positivo. Principalmente den e aspecto di uzo di e sistema digital.

Jacques Keltjeus a hiba palabra den nomber di Hof bisando na inicio cu tur miembro di Hof a mustra nan solidaridad cu e pueblonan di Caribe Hulandes, contribuyendo na un fondo entregando 18.6 miyon florin den un aña.

E pandemia a trece cu ne cu tin di e sedenan mester a sera nan porta completamente dado momento. Pero nan a traha duro pa habri e sedenan y na mesun momento trata di duna e servicio máximo na tur momento.

Hof den su totalidad por bisa cu e cantidad di casonan suave y averahe a baha un poco. Di otro banda, e casonan pisa a subi, principalmente na Corsou.

Pa tratamento di e casonan, mester adapta of mehora trayecto di proceduranan. Tambe a papia di e trabou grandi di mantención cu a tuma lugar n’e sede di Corte na Aruba.

Un trabou cu a logra finalisa danki, segun el a bisa, n’e bon cooperación entre Gobierno y bou guia di Monumentenbureau

Na inicio, e Vice Presidente a bisa, a haya nan confronta cu mester a pospone diferente sesion di Corte. Sinembargo a traha duro pa nan sigui por medio di video-conference of por escrito, caminda cu esaki ta posibel.

E personal di tur e sectornan y henter e proceso a bay den su gran parti digitalmente y video conference. 

Esaki a confronta su retonan tambe, Persrechter Debby Angela a bisa. Mas tanto na inicio, ora cu no semper e comunicación tabata bon pa cual tratamento di e casonan a dura mas largo.

“Pero esaki a duna nos experiencia, pasobra aworaki nos ta bek n’e normalidad, pero sentencianan ta wordo haci via di video conference.” Den e relato tambe ta para cu Aruba a haya un Hues local acerca y pronto lo haya uno mas p’e total di Huesnan local bira shete.