Prome encuentro di Biba Bida despues di un aña

Diamars, 1 di juni 2021, tabata precies un aña cu Biba Bida tabatin un encuentro cu su grandinan. Un fecha cu a scoge tambe pa prepara e grandinan pa temporada di horcan.

Biba Bida durante Covid-19 a adapta n’e situacion y a crea un “Buddy System” pa mantene contacto cu e grandinan via telefon. Tambe a bishita e grandinan algun biaha na cas durante 2020. Pero awor cu nos grandinan ta vacuna, a dicidi pa cuminsa cu e programa di actividad bek.

Durante e atardi, e team di Biba Bida a organiza un programa hopi interesante y anima, cu a encera un tayer cortico di preparacion pa horcan. Durante esaki, a siña e grandinan kico pa tene cuenta cu ne, kico pa hiba si mester evacua. Tambe na final a quiz e grupo cu premionan pa cortesia di Starbucks y Aquarius Restaurant.

Despues a entretene e grandinan cu un wega masha creativo di Memoria (pensa wega di mesa Memory) cu flora y fauna di Aruba. Sigui pa un wega di “Freeze” unda a laga nan balia na mesa riba musica di ultimo 50 aña, compila p’e conocido locotor Roberto Geerman. Premionan pa e ganadornan a wordo patrocina pa Flora Market. E weganan aki tabata masha anima y ta cumpli cu e rekisitonan di e programa Biba Bida, cu ta movecion y educacion. Na final tur hende a haña un regalo di Diamonds International. Cruz Cora Aruba y team Biba Bida ta gradici tur cu a aporta n’e evento y ta sumamente contento di por a brinda e grandinan porfin un encuentro despues di hopi tempo.