Taskforce di Reino pa Derecho di Mucha ta haya su propio website

E Taskforce di Reino pa Derecho di Mucha a lansa su propio website dia 1 di juni 2021. A lanta e Taskforce aki na 2014 cu e meta pa stimula cooperacion den Reino, riba tereno di derecho di mucha. Comparti conocemento, crea conexion y cooperacion entre paisnan ta e obhetivo principal.

E paisnan miembro di e Taskforce ta: Aruba, Corsou, St. Maarten y Hulanda, ademas di e entidadnan publico di Bonaire, St. Eustatius y Saba. E website cu a caba di lansa ta fungi como plataforma cu informacion actual tocante derecho di mucha n’e 6 islanan y ta destina pa comparti conocemento y stimula cooperacion entre tur miembro di Taskforce y otro stakeholder.

E website ta contene principalmente informacion dirigi na profesionalnan cu ta traha pa y cu mucha y hoben den tur area di trabou, for di educacion te husticia. Pa wak e site y pa informacion adicional por bay na www.tfkinderrechten.info p’e version na Hulandes y www.tfchildrights.info pa e version na Ingles. Alabes Taskforce ta pidi tur profesional den Reino cu ta traha pa y/of cu mucha y hoben pa registra via e website pa ricibi e boletin di informacion cu lo sali tur kwartaal. Si ta trata di un profesional cu a yega di asisti na un di e conferencianan di Taskforce den pasado, e persona aki lo ricibi e boletin di informacion automaticamente. Pa mas informacion, por fabor tuma contacto cu un representante di Taskforce na Aruba, Sacha Geerman sacha.geerman@dsz.gov.aw.