CaribResearch ta preparado un Agenda di Investigacion 2021-2025 p’e 6 teritorionan Caribense den Reino Hulandes

CaribResearch ta un fundacion di investigacion no gubernamental independiente estableci na Aruba na 2018 y registra na Camara di Comercio di Aruba. CaribResearch t’e prome y te ainda e unico fundacion di investigacion cu ta representa e 6 teritorionan Caribense den Reino Hulandes: Aruba, Corsou, Boneiro, St. Maarten, Saba y Statia.

E 9 miembronan de directiva di CaribResearch ta profesionalnan academico local cu experiencia den investigacion y conocemento y comprension profundo di cultura, historia y realidad local di e 6 teritorionan. E Cuerpo di Conseho di CaribResearch ta forma pa experto den investigacion y lider academico di Aruba, Corsou, Puerto Rico, Hulanda y Merca.

CaribResearch a asumi e responsabilidad pa haci investigacion di calidad halto, culturalmente relevante, eticamente responsabel, sistemico y integra.

Meta ta pa sirbi e resiliencia, progreso y soberania di e comunidadnan di e teritorionan Caribense den Reino Hulandes. E privilegio y e responsabilidad pa inicia, realisa, coordina y interpreta investigacion local ta principalmente den man di experto di investigacion local.

Ta nan ta compronde e fenomenonan local mihor y tin e derecho fundamental pa genera y duna sentido na e conocemento y comprension necesario tocante fenomeno social local.

CaribResearch ta creando un organisacion fuerte cu por asumi e responsabilidad aki.

Actualmente CaribResearch ta conta cu un grupo di alrededor di 15 coordinador di area di investigacion y 20 miembro di e “comunidadnan di investigador” cu ta organisa rond di e 5 areanan di investigacion. Nos comunidadnan di investigacion tambe lo inclui experto di nos diaspora den exterior.

Despues cu presenta su Agenda de Investigacion 2021-2025, CaribResearch lo drenta den un siguiente etapa den cua lo ehecuta proyecto di investigacion  na forma structura y lo fortalece mas ainda e competencia local di investigacion den diseño y metodologia di investigacion, tanto cuantitativo como cualitativo.

Tambe lo crea cuadro conceptual relevante y organisa seminario tematico. Ademas lo inicia proyecto di colaboracion entre CaribResearch y organisacion local, regional y internacional. CaribResearch pronto lo lansa su website pa mantene tur esnan cu ta interesa den su actividadnan di investigacion bon informa.

Directiva di CaribResearch ta consisti di e siguiente personanan: Lydia Emerencia, PhD, Presidente, (Bonaire); Richenel Ansano, MA., Vice-Presidente (Curaao); Jessica Berkel, Msc.,Ssecretario (Statia)