Diaranson awor Aruba ta ricibi prome crucero despues di inicio di e pandemia

Aruba Ports Authority N.V. (APA) ta orguyoso di anuncia cu si tur cos cana debidamente, diaranson awor pa 8:00 am lo drenta waf e crucero “Millennium” di Celebrity Cruises. El a sali for di Sint Maarten y tin Aruba riba su itinerario.

E crucero lo sali bek pa 6:00 pm, pues lo pasa henter un dia mara den waf di Oranjestad, percurando pa e recuperacion economico cu tanto nos isla ta anhelando.

 “Ta mas di un aña cu e operacion na waf di Oranjestad, pa loke ta crucero, tabata practicamente cera. Cu excepcion di algun crucero cu a opta pa bin staciona na Aruba, nos no a ricibi ningun pasahero mas desde cu e ultimo crucero a sali di Aruba dia 13 di maart 2020.

Pues e siman aki pa nos ta yena cu emocion y determinacion p’e caminda di recuperacion”, asina Marc Figaroa, Director di APA a bisa den fin di siman mientras ta supervisando trabounan di preparacion pa yegada di e crucero.

E crucero lo nabega cu tripulacion y pasaheronan riba 18 aña vacuna. Siguramente esaki no ta un logro di APA unicamente, sino di un team consistiendo di entro otro APA, Directie Volksgezondheid, Aruba Tourism Authority, Directie Scheepvaart Aruba hunto cu Crisis Team pa prepara y aproba e protocolnan p’asina Aruba por a cuminsa ricibi barco crucero un biaha mas den nos waf na Oranjestad.

E forma cu Aruba ta bin ta manehando e pandemia, sigur a duna su fruto, si tuma nota cu esaki lo t’e prome crucero cu lo cuminsa nabega den Caribe desde e inicio di e pandemia y Aruba por tin e honor pa ta parti di esaki. Ta spera e crucero dos biaha pa luna na Aruba, desde luna di juni. A renoba henter Celebrity Millennium.