Formadó a fluit Ramon Chong bèk: “Off-side”

WILLEMSTAD – Un reakshon verbal furioso i eksplosivo i hasta bergonsoso tabata reakshon dje kandidato pa ser postulá komo Minister di Ekonomia den e posibel koalishon MFK/PNP riba e desishon di Formador di gobiernu mr. Chester Peterson, kende no a presentá Ramon Chong su postulashon komo Minister den e Gabinete.

E reakshon a laga un sabor amargo serka mayoria di hende ku a tende i mira kon e ‘wannabe’ Minister a fulminá kontra e desishon ei.

Porcierto ku e èks kandidato komo futuro Minister mes a anunsiá ku e no por wordu presentá komo un Minister pa forma parti di e Gabinete nobo ku próksimamente lo tuma asiento.

E desishon di Formador ta basá riba e hecho ku Prokurador General a raportá na Formador ku aparentemente ainda tin

informashon di Chong den su registro di karchi di kastigu i e sistema di “strafblad” den e servisio di dokumentashon di hustisia, ku ta data di aña 2003.

Konsekuentemente segun lei di screening, Formador no por a presenta su persona pa por bira Minister.

Ramon Chong  ta lamentá esaki i aktualmente e ta studiando mas aleu e informashon den e karta risibí.

Anteriormente Chong a deklará ku el a konsiderá un eventual rechaso di su kandidatura, pero a disidi pa postulá su mes despues di a konsultá ku un èks Formador di gobiernu, Glenn Camelia, èks Gezaghebber i èks Minister Stanley Betrian i Rutsel Martha kendenan lo a garantisá Ramon Chong ku e ta pasa screening di servisio di inteligensia di Korsou.

BERPUT A HABRI

Despues di tirada di Ramon Chong  den medionan di komunikashon mesora reakshonnan a kuminsa invadi medionan sosial prinsipalmente relatando fechorianan ku Chong a kometé den su pasado politiko den seno di Partido Nashonal.

Un komentarista a refreská memoria di opinion publiko relatando tempu ku Ramon Chong i su amigu del alma Gerrit Schotte  a hasi un biahe super de luxe pa diferente pais pa atraé invershonista.

E outor dje komentario ta rekorda manera ta ayera kon e dos ‘holgazonnan’ a bai bishita dos prins Arabe,  kendenan tabata nèchi sintá steif manera ruman ohochi riba stul lomba règ pa atendé ku e dos representantenan di Kòrsou, kendenan tabata bentá riba sofa ta ‘bende’ Kòrsou papiando ku nan mannan.

I kon nan a splika e Arabenan kon basta nan haña un komishon pa regla tur deseo di e Arabenan.

Tabata un bergwensa pa Kòrsou te ku dado momento e Arabenan a lanta kana bai laga Chong ku Schotte.

Tur hende por a mira e imagen aki na Telecuracao.

Un puesto ministerial sigur e tempu aya i posiblemente hoy en dia tambe, ta manera di gana plaka sin eskrupulo.

Braam sikiera a hasi lo korekto i a tene honor na su mes pero a pasa 20 aña i Chong no a siña nada.