No mas mentalidad di ping pong. NO MAS MEP OF AVP

Pa: Professor Earney Lasten PhD MA MSC

Falta poco díanan pa bai urna electoral pa deposita bo voto. Corda no haci e mesun error cu pasado a siña nos. E Gobierno den su prome gobernación sea ta cu AVP of MEP ta purba haci lo mihor, pero den e di dos tanda e patronchi ta cambia y bira un gGbierno golos cu poder. Mi persona a yega di vota p’e parti emocional y custumber liga na kico además MEP a haci pami den tempo di Betico y Nel. Awe tur dos partidonan, esta MEP y AVP a para bira otro ehemplo egoísta pa país Aruba.

Honestidad y integridad no tey mas den tempo di nos ex mandatarionan. Awor, politiconan ta purba mas tanto yuda bou mesa y crea formulanan di corupción cu ta aparenta legal. Si papia di AVP, tur hende sa cu den día cla a “horta” país Aruba via amigonan. Tin Ministernan y nan amigonan a bai cera y ainda falta mas. Den pasado algún tabatin e suerte di no ser persigui mas, pero ta keda cu e seyo y marca di ta corupto. Pero tog pueblo a vota pa nan y a dura hopi pa saca nan afor di gobernación. Ken por bisa cu e mala maya a cambia di AVP?

Mi sa cu tin hende, ni kico malo AVP haci, tog ta sigui vota pa nan ya cu e político ta bisiña, amigo, etc. y ta gusta un custumber of tradición cu ta partido grandi so sa goberna. Esaki ta un problema di mentalidad ping pong. Si, papia di MEP, e ta un partido di medidanan premedita cu ta trata di pinta cosnan bon. Mi ta duna un ehempel. Ta kita hende di Gobierno, ta baha gasto directo di Gobierno, ta pone belasting, etc. pero, di otro banda, ta busca consultants, famianan, amigonan cercano cu ta fiel na nan pa duna proyectonan y negochi pa trabou.

Dus, e gastonan halto di e maneho di Gobierno ta keda halto. Uno ta horta sin give a them, y e otro ta play wise y tambe ta tuma un omweg bin bek cu e peso di medidanan riba pueblo humilde di Aruba. Dus, tur dos ta mescos. Compatriotanan, votadornan, e bolo cu nos mes ta prepara cu nos mes ingredientenan ta di nos mes como donñ. Nos tin cu presta algún gobernantenan pa un prijs cu nos mes tin cu paga pa nan tuma nos bolo, come esaki, y kisas parti cu nos tur. Esaki yama bo voto sagrado cu abo y nos a laga goberna y dirigi un país.  Es mas, ta bai tin hende sabi cu un setup ken por y lo goberna. Tur politiconan ta purba score punto.

Den e ultimo elección, a bin un coalición. Den mi opinión- danki Dios, pero no ehemplar. Analisa bon kende y con e cartera nan a wordu poni riba un wega di schaak. Por ehempel, ta duna un Minister tres cartera pa score mas punto cu esun cu tin un cartera of cartera inpopular. Naturalmente tin un desequilibrio si duna otro mas pa score y crea un percepción comosifuera e Minister di tres cartera a traha bon. Normalmente ta departamentonan di Gobierno ta traha p’e Minister, no e Minister mes. Por ehemplo, Aruba Tourism Authority t’esun cu ta yuda den turismo of e Minister? Puntra bo mes con e marketing pa bo kere ta tuma lugar.

Desde comienzo tur hende sa cu MEP cu ta pronk cu integridad (e idea a nace di otro partido) a bai goberna cu dede largo studiante di AVP- Otmar Oduber. POR ta y tabata un lapilapi cu hopi placa pa cumpra hende. E no tabata un partido sustenibel, pero no tabata por otro. A baha Gobierno di e forma aki diripiente pa score zetels di POR. Kier mandato absoluto cual mi (y nos) ta contra. Venezuala y China tambe ta purba goberna nan so.

E patronchi di historia ta cu AVP y MEP, den e di dos Gobierno a y ta bira golos y goberna malo. Dus pakiko keha despues atrobe? Enfin, pa algun, ni si MEP tratabo malo, MEP bo ta keda pa motibo di custumber. Ami ta basa mi expertisio, experiencia y prueba cu MEP no ta Betico ni Nel mas. Of e ta ainda Betico y Nel pa motibu di nostalgia? Tampoco AVP ta famia Eman di antes mas.

Mi a yega di vota solamente MEP. Pero no mas. Otro partidonan tambe a cuminza di zero mescos cu MEP y AVP a yega di ta no-existente. Djis imagina bo mes un día un Gobierno sin MEP, y sin AVP. Tur hende lo conta y mas transparencia lo tin. Mi ta haci un yamada extenso pa pensa bon prome cu vota. Bo tin hopi chance di lamenta mañan. Historia a demostra esaki den pasado. Kico abo tin di perde, di purba hendenan cu no ta basilabo, gañabo, hunga politiek, etc. manera Raiz, PPA, etc. (cu excepcion di POR).

Mi ta haci un yamada extenso pa nos tur bin hunto cu mas nos crea swing votersnan cu ta sali di MEP y AVP. No rabia cu AVP y kere ta MEP bo mester ta of viceversa. Ban haci e otro partidonan grandi cu zetels unda no ta un Gobierno so di MEP y AVP tin. Pasobra, esaki lo crea un sorto di mi ta yuda esnan cu a vota pami so. Hopi peligroso pa pone tur e webonan den un macuto so. Awor si nan mester bo voto. No vota pa un number, leter, un cantica, of un bril. Abo mes por wak bon y bo cartera y pan riba mesa tin mas balor. Vota sin partido Ping, sin partido Pong. Nan ta dal e bala mescos. Nos no kier tende e mesun storianan di lamento después.